აშშ-ის პრეზიდენტ დონალდ ტრამპის მხარდაჭერით, კონგრესი რუსეთის წინააღმდეგ დამატებითი სანქციების შესახებ ორპარტიული კანონპროექტის განხილვას იწყებს. ამის შესახებ ამერიკელმა სენატორმა ლინდსი გრემმა განაცხადა.
მან თქვა, რომ ტრამპს „უკრაინაში სისხლისღვრის შესაჩერებლად მეტ ინსტრუმენტს“ მისცემენ.
„კანონპროექტი აშშ-ის პრეზიდენტს საშუალებას აძლევს, საკუთარი შეხედულებისამებრ დააწესოს მეორადი სანქციები და ტარიფები იმ ქვეყნების მიმართ, რომლებიც განაგრძობენ იაფი რუსული ნავთობისა და გაზის შეძენას, რითაც მხარს უჭერენ პუტინის ომის მანქანას“, - დაწერა მან სოციალურ ქსელ X-ში.
გრემმა დასძინა, რომ კანონპროექტი ამერიკელ ლიდერს მეტ მოქნილობას და უფლებამოსილებას მისცემს, რათა პუტინს სამშვიდობო მოლაპარაკებებზე დათანხმება აიძულოს, რაც გავლენას მოახდენს არა მხოლოდ რუსეთზე, არამედ, მაგალითად, ირანზეც, რომელიც პუტინის რეჟიმს უჭერს მხარს.
სენატორმა ასევე ხაზგასმით აღნიშნა, რომ რუსეთის ორი უმსხვილესი ნავთობკომპანიის წინააღმდეგ სანქციებმა „უკვე მნიშვნელოვანი გავლენა მოახდინა“.
