ჩვენი ევროპელი პარტნიორები მხარს უჭერენ ქართველ ხალხს – უვიზო შეჩერება არ უნდა შეეხოს მოქალაქეებს, სანქციები უნდა დაუწესდეს მხოლოდ ივანიშვილს და იმ ადამიანებს, რომლებიც ყოველდღიურად არღვევენ ადამიანის უფლებებს, - განაცხადა “ნაციონალური მოძრაობის” თავმჯდომარის პირველმა მოადგილემ, ლევან სანიკიძემ
ლევან სანიკიძის განცხადებით, პარტიის წარმომადგენლები აგრძელებენ მნიშვნელოვან შეხვედრებს ევროპის დედაქალაქებში.
“ვაგრძელებთ ძალიან მნიშვნელოვან შეხვედრებს ევროპის დედაქალაქებში. დღეს ვართ ბრიუსელში, სადაც გვქონდა პრინციპული საუბრები ჩვენს ევროპელ პარტნიორებთან, ევროპარლამენტის წევრებთან, ევროკომისიის წარმომადგენლებთან, სადაც აქტიურად ვსაუბრობთ, რომ უვიზო მიმოსვლის შეჩერების საკითხი არ უნდა შეეხოს ჩვენს ოთხ მილიონ თანამოქალაქეს, რომლებიც იბრძვიან ამ ქვეყნის თავისუფლებისთვის და ევროპული მომავლისთვის. სანქციები უნდა დაუწესდეს მხოლოდ და მხოლოდ იმ მიზნობრივ ჯგუფებს, იმ ადამიანებს, რომლებიც არღვევენ ადამიანის უფლებებს ყოველდღიურად ივანიშვილის დავალებით. რა თქმა უნდა, საუბარი შეეხებოდა პოლიტპატიმრების საკითხს, ქვეყანაში შექმნილ პოლიტიკურ კრიზისს და ბუნებრივია ჩვენ ვგრძნობთ ჩვენი ევროპელი პარტნიორების იმ მხარდაჭერას, რომელიც ქართველი ხალხის გმირული ნაბიჯებით არის განპირობებული.” - განაცხადა ლევან სანიკიძემ.
ცნობისათვის, "ერთიანი ნაციონალური მოძრაობის" ინფორმაციით, პარტიის თავმჯდომარე თინა ბოკუჩავა და თავმჯდომარის პირველი მოადგილე ლევან სანიკიძე ბრიუსელში ვიზიტის ფარგლებში ევროპარლამენტის წევრებს, ევროკომისიის წარმომადგენლებსა და ევროკომისიის ვიცე-პრეზიდენტის კაია კალასის ოფისის წარმომადგენლებს შეხვდნენ.
