სლოვენიის პრეზიდენტის, ნატაშა პირც მუსარის თქმით, აშშ-ის პრეზიდენტი დონალდ ტრამპი დარწმუნდა, რომ კრემლი მას ეთამაშებოდა და ამიტომ შეცვალა პოზიცია რუსეთის მიერ უკრაინის წინააღმდეგ ომთან დაკავშირებით. ამის შესახებ პირც მუსარმა უკრაინულ მედიასთან ინტერვიუში განაცხადა.
„მე მოხარული ვიყავი ამის[ტრამპის პოზიციის შეცვლის] მოსმენით“, - აღნიშნა პრეზიდენტმა.
მისი აზრით, აშშ-ის პრეზიდენტი გულწრფელი იყო ომის 24 საათში შეჩერების განზრახვაში,
„თუმცა ის მიხვდა, შესაძლოა ცოტა გვიან, მაგრამ მიხცდა, რომ ეს ასე არ იყო“, - აღნიშნა ნატაშა პირც მუსარმა.
„ამიტომ, ძალიან დიდი იმედი მაქვს, რომ ის გააგრძელებს მუშაობას მშვიდობის მისაღწევად. ყოველთვის დარწმუნებული ვიყავი, რომ ის მუდმივად ამ მიმართულებით მოძრაობდა და ღია იყო დიალოგისთვის“, - განაცხადა სლოვენიის პრეზიდენტმა.
პირც მუსარმა აღნიშნა, რომ აშშ-ის პრეზიდენტს მრავალი ბერკეტი აქვს. ამავდროულად, მან ხაზი გაუსვა ევროკავშირის პასუხისმგებლობასაც.
„ევროკავშირმა უნდა გააგრძელოს უკრაინის მხარდაჭერა და ჩვენ ამ საკითხზე ერთ ხმაში უნდა ვისაუბროთ. თუ ერთ დიდ ზესახელმწიფოს უბრალოდ საერთაშორისო სამართლის დარღვევის უფლებას მივცემთ, ბევრი მის მსგავსად მოიქცევა. სწორედ ეს დევს სასწორზე“, - აღნიშნა სლოვენიის პრეზიდენტმა.
შეკითვაზე, თუ რას შეეძლო გავლენა მოეხდინა ტრამპის პოზიციის შეცვლაზე, მან განმარტა, რომ მისმა კონტაქტებმა ევროპელ ლიდერებთან მნიშვნელოვანი როლი ითამაშა.
„ვფიქრობ, პრეზიდენტი ტრამპი ბევრ ევროპელ პოლიტიკოსს ესაუბრება და ბევრმა სახელმწიფოს მეთაურმა უამბო მას ევროკავშირის პოზიციის, ისტორიისა და იმის შესახებ თუ რა დგას არსებული საკითხების უკან,“ - განაცხადა სლოვენიის პრეზიდენტმა.
შეგასენებთ, ტრამპმა განაცხადა, რომ ახლა უკრაინას აქვს შანსი, აღადგინოს კონტროლი მთელ თავის ტერიტორიაზე საერთაშორისოდ აღიარებულ საზღვრებში.
