7 სექტემბრის ღამეს რუსეთის ფედერაციის მიერ უკრაინაზე რეკორდული მასშტაბის დრონებითა და სარაკეტო თავდასხმის შემდეგ, ევროპული საბჭოს პრეზიდენტმა ანტონიო კოშტამ განაცხადა, რომ პარტნიორებმა „არჩეული კურსი უნდა დაიცვან“.
„მშვიდობაზე საუბარი დაბომბვების გაძლიერების და სამთავრობო და საცხოვრებელ შენობებზე დამიზნების პარალელურად, პუტინისეული „მშვიდობის“ ვერსიაა“, - წერს კოშტა Х-ზე.
მისი თქმით, რუსეთმა დაიწყო ეს ომი და რუსეთმა გადაწყვიტა მისი გაგრძელება.
„ჩვენ უნდა გავაგრძელოთ არჩეული კურსის დაცვა: გავაძლიეროთ უკრაინის თავდაცვა და გავზარდოთ ზეწოლა რუსეთზე დამატებითი სანქციების გზით, ჩვენს მოკავშირეებთან და პარტნიორებთან მჭიდრო კოორდინაციით“, - განაცხადა კოშტამ.
ამასთან, მან აღნიშნა, რომ „უკრაინელი ხალხის ძალა და გამძლეობა კვლავაც გვაძლევს ყველას შთაგონებას“.
