აქტივისტი ანუკი ჩრდილელი 2-დღიანი ადმინისტრაციული პატიმრობიდან გათავისუფლდა. როგორც მან თბილისის საქალაქო სასამართლოსთან ჟურნალისტებს განუცხადა აპირებს თამთა მეგრელიშვილს მის შესახებ გავრცელებული ინფორმაციის გამო უჩივლოს.
“თითით ანიშნეს ჩემზე, ეს დააკავეთო. ტროტუარზე ვიდექი, შესაბამისად არ ყოფილა არანაირი გაფრთხილება, ან მოწოდება. ფიზიკურად ვერ იქნებოდა, რადგან დღისით ვიდექი რუსთაველის თეატრთან , არ ვიცი, რა დავაშავე ტროტუარზე დგომით. ოქმში ჩამიწერეს, რომ ვილანძღებოდი და ვიგინებოდი, ასეთი არაფერი ყოფილა. ასევე, ვინც მანქანაში შემაგდო სხვა ადამიანია, ხოლო დამკავებლად სრულიად სხვა ადამიანი გამიფორმეს.
არ ვიცი მეგრელიშვილს რატომ ჰგონია , რომ მე „ნაცებს“ ან „ქოცებს“ ვარ მიბმული და ამ ჩემ ჯანმრთელობის მდგომარეობაზე ადვოკატმა ქალმა ისაუბროს. აუცილებლად ვუჩივლებ სამართლებრივად. ცრუ ჯანმრთელობის მდგომარეობის გამოტანა ასე არ ხდება. რამე ფსიქიკური პრობლემები მე არ მქონია და თუ ეს საჯაროა ეს ყველაფერი,ამაზე მე დასკვნას გამოვიტან“,- აცხადებს ჩრდილელი.
აქტივისტი ანუკი ჩრდილელი, პარლამენტთან, 2 სექტემბერს დააკავეს. ის "ქართული ოცნებიდან" თბილისის საკრებულოს დეპუტატობის კანდიდატის ოთარ ჩრდილელის შვილია. ოთარ ჩრდილელი "ქართული ოცნების" პრორციული სიის მე-10 ნომრად კახა კალაძემ 1-ელ სექტემბერს წარადგინა.
ამის შემდეგ, ექსპერტმა თამთა მეგრელიშვილმა დაწერა, რომ „წლებია ოთარ ჩრდილელს ანუკი ჩრდილელის გადაწყვეტილებით არათუ მამაშვილური არამედ არანაირი კავშირი არ აქვს მასთან, მას წლებია თვალით არ უნახავს“. ასევე, ის აღნიშნავს, რომ „ანუკი ჩრდილელს მენტალური პრობლემები აქვს“ და ამ მდგომარეობას „პოლიტიკური მიზნებისთვის კარგად იყენებს ნაციონალური მოძრაობა“.
