უკრაინის პრეზიდენტი ვოლოდიმირ ზელენსკი რუსეთის მიერ 30 აგვისტოს ღამეს განხორციელებულ მასშტაბურ დაბომბვას ეხმიანება და მსოფლიოს „რეალური ზომების“ მიღებისკენ მოუწოდებს.
„ჩვენ ვნახეთ მსოფლიოს რეაქცია წინა დაბომბვაზე. თუმცა, ახლა, როდესაც რუსეთი კვლავ აჩვენებს, რომ სიტყვები არ აინტერესებს, ჩვენ რეალურ ქმედებებს ველით. აბსოლუტურად ნათელია, რომ მოსკოვმა ლიდერების დონეზე შეხვედრის მოსამზადებლად გამოყოფილი დრო ახალი მასშტაბური დარტყმების მოსამზადებლად გამოიყენა.
დიპლომატიისთვის შესაძლებლობების ფანჯრის ხელახლა გახსნის ერთადერთი გზაა მკაცრი ტარიფების დაწესება ყველა იმ პირის მიმართ, ვინც ფულს დებს რუსეთის არმიაში და ეფექტური სანქციები თავად მოსკოვის წინააღმდეგ - საბანკო და ენერგეტიკული. ეს ომი პოლიტიკური განცხადებებით არ დასრულდება - საჭიროა რეალური ნაბიჯები. ჩვენ ველოდებით ამერიკის, ევროპისა და მთელი მსოფლიოსგან მოქმედებებს“, - წერს ზელენსკი სოციალურ ქსელში.
პრეზიდენტის თქმით, ამ დროისთვის ცნობილია ერთი დაღუპულისა და ათობით დაშავებულის შესახებ, მათ შორის ბავშვების.
ცნობისათვის, გასულ ღამეს რუსეთის დარტყმების შედეგად დაზარალდნენ ვოლინის, დნიპროპეტროვსკის, დონეცკის, ჟიტომირის, ზაპოროჟიეს, ივანო-ფრანკოვის, კიევის, რივნის, სუმის, ხარკოვის, ხმელნიცკის, ჩერკასის, ჩერნივცის და ჩერნიჰივის რეგიონები.
