უკრაინის პრეზიდენტმა ვოლოდიმირ ზელენსკიმ ნიდერლანდების პრემიერ-მინისტრის მოვალეობის შემსრულებელ დიკ სხოოფთან სატელეფონო საუბარი გამართა რუსული აგრესიის შესაჩერებლად ბოლო დიპლომატიური ძალისხმევის შესახებ. ამის შესახებ ზელენსკიმ Х-ზე დაწერა.
ზელენსკიმ ნიდერლანდების მთავრობის ხელმძღვანელს მადლობა გადაუხადა დროშის დღისადმი მილოცვისა და რუსეთის მიერ სრულმასშტაბიანი შემოჭრის დაწყებიდან ნიდერლანდების მიერ გაწეული დახმარებისთვის.
უკრაინის პრეზიდენტმა ხაზგასმით აღნიშნა, რომ რუსეთი არ ავლენს მშვიდობისკენ რაიმე განზრახვას, ამიტომ საჭიროა ზეწოლა მისი პოზიციის შესაცვლელად და „ყველა საკითხის განსახილველად უმაღლეს დონეზე შეხვედრა“.
სხოოფთან საუბარში ზელენსკიმ ასევე განიხილა უკრაინის უსაფრთხოების პოტენციური გარანტიები.
„რა თქმა უნდა, ვისაუბრეთ პარტნიორებთან ჩვენს დიპლომატიურ მუშაობაზე და ვაშინგტონში გამართულ შეხვედრებზე. ახლა არსებობს რეალური შანსი, რომ ეს ომი დასრულდეს. უკრაინა მზადაა კონსტრუქციული ნაბიჯებისთვის, რამაც შეიძლება რეალური მშვიდობა დაამყაროს. თუმცა რუსეთი არ ავლენს რაიმე სახის მშვიდობის განზრახვას და აგრძელებს ჩვენი ქალაქების დაბომბვას. ჩვენ იგივენაირი შეფასება გაქვს ყველა იმ სიგნალთან დაკავშირებით, რომლებიც ამ დღეებში მოსკოვიდან მოდის. საჭიროა ზეწოლა, რომელიც შეცვლის მათ პოზიციას და შეხვედრა უმაღლეს დონეზე ყველა საკითხის განსახილველად. ჩვენ განვიხილეთ უსაფრთხოების გარანტიები. ახლა უკრაინის, აშშ-ისა და ევროპელი პარტნიორების გუნდები მუშაობენ თავიანთ არქიტექტურაზე. ყველა გეგმა მზად იქნება უახლოეს დღეებში. ჩვენ ვისაუბრეთ იმაზე, თუ როგორ შეუძლია ნიდერლანდებს გაზარდოს თავისი ჩართულობა ამ პროცესში და დაეხმაროს უსაფრთხოების უზრუნველყოფაში“, – წერს ზელენსკი.
