აშშ-ის პრეზიდენტის, დონალდ ტრამპის ადმინისტრაციაში მიიჩნევენ, რომ ისრაელის პრემიერ-მინისტრი ბენიამინ ნეთანიაჰუ კონტროლიდან გამოვიდა და თეთრ სახლში მისი ქმედებებით უკმაყოფილება სულ უფრო იზრდება. ამის შესახებ გამოცემა Axios წყაროებზე დაყრდნობით წერს.
ექვსმა წყარომ Axios-ს განუცხადა, რომ აშშ-ის შუამავლობით მიღწეული ცეცხლის შეწყვეტის მიუხედავად, რომელმაც სირიაში კონფლიქტის ესკალაცია შეაჩერა, კვირა იმით დასრულდა, რომ თეთრი სახლი ნეთანიაჰუსა და მისი რეგიონული პოლიტიკის მიმართ მნიშვნელოვნად უფრო შეშფოთებული გახდა.
„ბიბი შეშლილივით იქცევა. ის გამუდმებით ყველაფერს ბომბავს“, - განაცხადა თეთრი სახლის ერთ-ერთმა წარმომადგენელმა.
„ამან შეიძლება ძირი გამოუთხაროს იმას, რის გაკეთებასაც ტრამპი ცდილობს“, - დასძინა ოფიციალურმა პირმა.
აშშ-ის მეორე მაღალჩინოსანმა ასევე მიუთითა ამ კვირაში ღაზაში ეკლესიაზე მომხდარ თავდასხმაზე, რამაც პრეზიდენტი ტრამპი აიძულა, ნეთანიაჰუსთვის დაერეკა და ახსნა-განმარტება მოეთხოვა.
მესამე ამერიკელმა ოფიციალურმა პირმა განაცხადა, რომ ტრამპის ადმინისტრაციაში ნეთანიაჰუს მიმართ სკეპტიციზმი იზრდება - არსებობს განცდა, რომ ის ზედმეტად იმპულსური და დესტრუქციულია: „ნეთანიაჰუ ზოგჯერ ბავშვს ჰგავს, რომელსაც უბრალოდ არ სურს სწორად მოქცევა“, _ თქვა მან.
თუმცა, ტრამპი ჯერჯერობით თავს იკავებს ნეთანიაჰუს საჯაროდ კრიტიკისგან და გაურკვეველია, იზიარებს თუ არა ის თავისი მრჩევლების იმედგაცრუებას. ბოლომდე გაურკვეველია, იზიარებს თუ არა ის თავისი გუნდის ბოლოდროინდელ შეშფოთებას ისრაელის ქმედებებთან დაკავშირებით სირიაში.
