სირიის პრეზიდენტი აჰმედ ალ-შარაა ბაქოში სამუშაო ვიზიტით იმყოფება, სადაც აზერბაიჯანის პრეზიდენტს, ილჰამ ალიევს შეხვდა.
მედიის ინფორმაციით, შეხვედრაზე ილჰამ ალიევმა იმედი გამოთქვა, რომ აჰმედ ალ-შარაას აზერბაიჯანში ვიზიტი ქვეყნებს შორის ურთიერთობების განვითარებაში მნიშვნელოვანი იქნება.
ალიევმა ხაზი გაუსვა, რომ სირიაში ახალი მთავრობის ჩამოყალიბების შემდეგ ურთიერთობების განვითარების დიდი პერსპექტივები გაიხსნა.
აჰმედ ალ-შარაამ, თავის მხრივ, სინანულით აღნიშნა, რომ წინა მთავრობამ სირიის ურთიერთობები ბევრ ქვეყანასთან, მათ შორის აზერბაიჯანთან, დააზიანა.
მან განაცხადა, რომ სირია დაინტერესებულია აზერბაიჯანთან თანამშრომლობით პოლიტიკურ, სავაჭრო, ეკონომიკურ, კულტურულ, ჰუმანიტარულ და სხვა სფეროებში.
შეხვედრაზე აღინიშნა ქვეყნებს შორის თანამშრომლობის მნიშვნელობა, კერძოდ, ენერგეტიკის სექტორში და აღინიშნა, რომ სირია ამჟამად სერიოზული ენერგეტიკული პრობლემის წინაშე დგას.
ამ კონტექსტში ხაზგასმით აღინიშნა, რომ უახლოეს მომავალში განხორციელდება აზერბაიჯანული გაზის თურქეთის გავლით სირიაში ექსპორტის პროექტი, რაც ხელს შეუწყობს ამ ქვეყნის ენერგეტიკული უსაფრთხოების უზრუნველყოფას.
ყურადღება გამახვილდა იმაზე, რომ აზერბაიჯანს შეუძლია წვლილი შეიტანოს სირიაში ენერგეტიკული სექტორის აღდგენაში.
