ამერიკული გამოცემა Wall Street Journal ანონიმურ ოფიციალურ პირებზე დაყრდნობით იუწყება, რომ აშშ-ის პრეზიდენტი დონალდ ტრამპი უკრაინაში Patriot-ის ტიპის კიდევ ერთი საზენიტო-სარაკეტო სისტემის გაგზავნას განიხილავს.
გაზეთი აღნიშნავს, რომ თუ ტრამპი ასეთ გადაწყვეტილებას მიიღებს, ეს იქნება პირველი შემთხვევა, როდესაც ის უკრაინისთვის ახალი მძიმე შეიარაღების მიწოდებას დაამტკიცებს: აქამდე აშშ მხოლოდ პრეზიდენტ ბაიდენის დროს დამტკიცებულ მიწოდებას აგრძელებდა.
გამოცემის ცნობით, თეთრმა სახლმა პენტაგონს დამატებითი შეიარაღების სხვა ვარიანტების მომზადება სთხოვა. ოფიციალური პირები ასევე სწავლობენ, შეუძლიათ თუ არა სხვა ქვეყნებს უკრაინისთვის Patriot-ების სისტემის მიწოდება.
პარალელურად, განიხილება მოკავშირეების მოზიდვის შესაძლებლობა კიევში ამ ტიპის კიდევ რამდენიმე სისტემის გადასაცემად.
პენტაგონის ყოფილი მაღალჩინოსნის თქმით, აშშ-მა კიევს Patriot-ის სამი სისტემა მიაწოდა, გერმანიამ კიდევ სამი, ხოლო ერთი სისტემა ევროპული ქვეყნების კონსორციუმმა გადასცა.
ორშაბათს ტრამპმა და შემდეგ პენტაგონმა განაცხადეს, რომ ისინი განაახლებდნენ უკრაინისთვის იარაღის მიწოდებას, თუმცა არ დაუკონკრეტებიათ, რომელი ტიპის იარაღზე იყო საუბარი.
ტრამპმა კიდევ ერთხელ გაიმეორა, რომ ძალიან უკმაყოფილო იყო პუტინის საქციელით და სამშაბათს კიდევ უფრო მკაცრად ისაუბრა და თქვა: „პუტინი ბევრ სისულელეს ეუბნება. ის ყოველთვის ძალიან თავაზიანია, მაგრამ ამის მიღმა არანაირი აზრი არ დევს.“
