რუსეთის პრეზიდენტი ვლადიმირ პუტინი რუსი ჯარისკაცების მასობრივ მკვლელად იქცა და სრულიად უგულებელყოფს აშშ-ის სამშვიდობო ძალისხმევას.
ამის შესახებ უკრაინის საგარეო საქმეთა მინისტრმა ანდრიი სიბიჰამ X -ზე დაწერა.
მინისტრმა აღნიშნა, რომ პუტინის სარისკო განცხადებები აშშ-ის სამშვიდობო ძალისხმევის სრულ უგულებელყოფას აჩვენებს.
„მიუხედავად იმისა, რომ შეერთებული შტატები და დანარჩენი მსოფლიო მკვლელობების დაუყოვნებლივ შეწყვეტას მოითხოვს, რუსეთის მთავარი სამხედრო დამნაშავე უკრაინის მიწების შემდგომი მიტაცებისა და უკრაინელების მკვლელობის გეგმებზე საუბრობს“, - განაცხადა სიბიჰამ.
ამავდროულად, როგორც საგარეო საქმეთა მინისტრი აღნიშნავს, პუტინის მიერ დღეს გაკეთებული ყველა გიჟური განცხადებიდან გამოირჩევა, ერთი განცხადება “რუსი ჯარისკაცის ფეხის შესახებ“.
„სინამდვილეში, სადაც რუსი ჯარისკაცი ფეხს დადგამს, მხოლოდ სიკვდილი, ნგრევა და განადგურება მოაქვს“, - აღნიშნა სიბიჰამ.
სიბიჰამ განაცხადა, რომ პუტინს არ აინტერესებს რუსი ჯარისკაცები ან უკრაინული დრონების მიერ მოგლეჯილი მათი ფეხები.
„ის საკუთარი ხალხის მასობრივი მკვლელია. მან უკვე მოკლა მილიონი რუსი ჯარისკაცი უკრაინაში უაზრო სისხლისღვრაში, ყოველგვარი სტრატეგიული მიზნის მიღწევის გარეშე. ერთი მილიონი ჯარისკაცი. ორი მილიონი ფეხი“, - თქვა სიბიჰამ.
ამავდროულად, საგარეო საქმეთა მინისტრის თქმით, „ვიდრე პუტინი სხვა ქვეყნებში შეჭრისთვის რუსული ჯარების გაგზავნით არის დაკავებული, ის ქვეყნის შიგნით რუსებს ეკონომიკურო მოსაზრებით მუხლებზე აყენებს“.
„მისი ცინიკური განცხადებები მხოლოდ ერთ მიზანს ემსახურება: საზოგადოების ყურადღების გადატანას მისი მეოთხედი საუკუნის მმართველობის სრული კრახიდან, რომელმაც რუსეთი შეიყვანა ისეთი სამარცხვინო რეჟიმების კლუბში, როგორიცაა ჩრდილოეთ კორეა და ირანი, საერთაშორისო იზოლაციაში და დაუსრულებელ ეკონომიკურ სტაგნაციაში, რომელიც მხოლოდ გაუარესდება“, - თქვა სიბიჰამ.
მისი აზრით, რუსეთის მშვიდობისკენ იძულების ერთადერთი გზა მისთვის დაუსჯელობის განცდის ჩამორთმევაა.
"გაზრდეთ უკრაინის თავდაცვის მხარდაჭერა, რუსეთი ტერორისტულ სახელმწიფოდ გამოაცხადეთ, სრულად მოახდინეთ მისი იზოლაცია, გონზე მოიყვანეთ მოსკოვი“, - განაცხადა სიბიჰამ.
პუტინმა დღეს განაცხადა: „არსებობს ასეთი ძველი წესი. იქ, სადაც რუსი ჯარისკაცი ფეხს დადგამს, ის ჩვენია“.
