უვიზო მიმოსვლის შეჩერების არანაირი საფუძველი არ არსებობს, მაგრამ როდესაც ვინმეს საფუძველი კი არა, საბაბი სჭირდება, საბაბს ყოველთვის მოიძიებს. შეგახსენებთ, რომ დიპლომატიური და სამსახურებრივი პასპორტებისთვის უვიზო მიმოსვლის შეჩერების გადაწყვეტილებით, ევროკავშირმა დაარღვია საერთაშორისო ხელშეკრულება საქართველოსთან, – ამის შესახებ საქართველოს პარლამენტის თავმჯდომარემ, შალვა პაპუაშვილმა განაცხადა.
„ბრიუსელმა დაარღვია საერთაშორისო ხელშეკრულება, რაც არის არასათანადო ქცევა. აქედან გამომდინარე, რთულია, განჭვრიტო, წინასწარ რა გადაწყვეტილებებს მიიღებენ, მით უმეტეს, როცა ხედავ ზოგიერთი ევროპული სუბიექტის რაღაც პარტიულ პოლიტიკურ მიკერძოებებს და გარკვეულ მავნე მიზნებს საქართველოსთან დაკავშირებით. არანაირი საფუძველი არ არსებობს. რაც შეეხება თვითნებობას და საბაბის ძებნას, ჩვენ თვითნებობასა და არაკეთილსინდისიერ ქცევაზე პასუხისმგებლობას ვერ ავიღებთ“, – განაცხადა პაპუაშვილმა.
დღეს ცნობილი გახდა, რომ ევროპულმა საბჭომ და ევროპარლამენტმა მესამე ქვეყნებთან უვიზო მიმოსვლის შეჩერების წესებზე შეთანხმებას მიაღწიეს.
