აშშ-ის პრეზიდენტმა დონალდ ტრამპმა განაცხადა, რომ აშშ-ის სამართალდამცავი ორგანოების ხელმძღვანელი რომ ყოფილიყო, კალიფორნიის შტატის გუბერნატორ გევინ ნიუსომს დააპატიმრებდა.
„მე ამას გავაკეთებდი, ტომის ადგილას რომ ვიყო“, - განუცხადა ტრამპმა თეთრ სახლში ჟურნალისტებს ნიუსომის განცხადებების კომენტირებისას, რომელიც მანამდე საჯაროდ დაუპირისპირდა აშშ-ის ადმინისტრაციის წარმომადგენელს საზღვრის კონტროლისა და არალეგალი იმიგრანტების დეპორტაციის საკითხებში ტომ ჰომანს,.
პრეზიდენტმა აღნიშნა, რომ კალიფორნიის გუბერნატორი ასეთ განცხადებებს მხოლოდ პოლიტიკური თვითრეკლამის მიზნით აკეთებს.
„მომწონს გევინ ნიუსომი, ის კარგი ბიჭია. თუმცა, ის სრულიად არაკომპეტენტურია, ეს ყველამ იცის“, - თქვა ტრამპმა.
ამასთან დაკავშირებით მან გაიხსენა ნიუსომის პროექტი, რომელიც კალიფორნიაში ჩქაროსნული რკინიგზის მშენებლობას ითვალისწინებს და ამჟამად ხარჯების გიგანტური გადაჭარბებით ხორციელდება.
„ჩვენ აქ (თეთრი სახლის სამხრეთ გაზონზე) [ახალ მრავალმეტრიან] დროშის ბოძს ვდგამთ. ხარჯები უფრო დაბალია, ვიდრე ხარჯთაღრიცხვაშია შეტანილი. მე ყოველთვის [მიზნების განხორციელებას ბიუჯეტზე ნაკლები ხარჯებით ვაღწევ]“, - აღნიშნა ტრამპმა.
მან ასევე მკაცრად დაგმო ლოს ანჯელესსა და სან ფრანცისკოში არეულობის მონაწილეები და მათ პროფესიონალი პროვოკატორები უწოდა.
„ადამიანები, რომლებიც პრობლემებს ქმნიან პროფესიონალი წამქეზებლები და მეამბოხეები არიან. ისინი ცუდი ადამიანები არიან. ისინი ციხეში უნდა იყვნენ“, - თქვა აშშ-ის პრეზიდენტმა.
