ისრაელის ელჩმა უკრაინაში, მიხაილ ბროდსკიმ, განაცხადა, რომ ისრაელმა უკრაინას Patriot-ის ტიპის საზენიტო-სარაკეტო სისტემები გადასცა, რომლებიც 1990-იან წლებში ისრაელის თავდაცვის ძალების შეიარაღებაში იყო.

„Patriot-ის სისტემები, რომლებიც ოდესღაც შეერთებული შტატებისგან მივიღეთ, ახლა უკრაინაშია. ეს არის ისრაელის სისტემები, რომლებიც ისრაელის შეიარაღებაში იყო 90-იანი წლების დასაწყისში. ჩვენ შევთანხმდით [ეს სისტემები] უკრაინისთვის გადაგვეცა. სამწუხაროდ, ამაზე ბევრს არ საუბრობენ. თუმცა, როდესაც ამბობენ, რომ ისრაელმა სამხედრო დახმარება არ გაუწია, ეს სიმართლეს არ შეესაბამება",- განაცხადა დიპლომატმა.

2024 წლის ივნისში, წყაროებზე დაყრდნობით, გამოცემა Financial Times-მა გამოაქვეყნა ინფორმაცია, რომ ისრაელი, აშშ და უკრაინა უკრაინის არმიისთვის Patriot-ის სისტემების მიწოდებაზე მოლაპარაკებებს აწარმოებდნენ.

გამოცემის ცნობით, ისრაელი მზად იყო უკრაინისთვის რვა საჰაერო თავდაცვის სისტემა გადაეცა.