დიდმა ბრიტანეთმა ღაზის სექტორში ისრაელის ქმედებების გამო, ისრაელთან თავისუფალი ვაჭრობის შესახებ მოლაპარაკებები შეაჩერა.
დიდი ბრიტანეთის პრემიერ-მინისტრ კირ სტარმერის მთავრობამ განაცხადა, რომ შეაჩერებს ისრაელთან თავისუფალი ვაჭრობის შესახებ მოლაპარაკებებს და სანქციებს დაუწესებს რამდენიმე პირსა და ორგანიზაციას, რომლებიც, მონაწილეობენ დასავლეთ სანაპიროზე პალესტინელების წინააღმდეგ ძალადობაში.
კირ სტარმერმა განაცხადა, რომ, საფრანგეთისა და კანადის ლიდერების მსგავსად, შოკირებულია ღაზის სექტორში სამხედრო ესკალაციით. ბრიტანეთის პრემეირ-მინისტრმა ასევე ცეცხლის შეწყვეტისკენ მოწოდება გაიმეორა.
„ჩვენ ვიმეორებთ ჩვენს მოწოდებას ცეცხლის შეწყვეტისკენ, როგორც ერთადერთ გზას მძევლების გასათავისუფლებლად. ჩვენ ვიმეორებთ, არ ვეთანხმებით დასავლეთ სანაპიროზე ისრაელის დასახლებებთან დაკავშირებულ მიდგომას და ჩვენ კვლავ მოვითხოვთ ღაზაში ჰუმანიტარული დახმარების მნიშვნელოვან გაზრდას“, – განაცხადა დიდი ბრიტანეთის პრემიერ-მინისტრმა.
ამასთან, დიდი ბრიტანეთის მთავრობამ ასევე დაიბარა ისრაელის ელჩი ციპი ჰოტოველი, რათა გამოეხატა თავისი უკმაყოფილება ღაზაში სამხედრო ოპერაციების გაფართოებასთან დაკავშირებით.
მიუხედავად იმისა, რომ საგარეო საქმეთა მინისტრმა დევიდ ლამიმ კიდევ ერთხელ გამოხატა მხარდაჭერა ისრაელის უფლების მიმართ, დაიცვას თავი ჰამასის 7 ოქტომბრის თავდასხმების შემდეგ, მან განაცხადა, რომ ბოლო ესკალაცია „მორალურად გაუმართლებელია“.
„ეს სრულიად არაპროპორციულია, სრულიად, სრულიად კონტრპროდუქტიულია“, - თქვა მან.
ისრაელის საგარეო საქმეთა სამინისტრომ საპასუხოდ განაცხადა, რომ დიდ ბრიტანეთთან სავაჭრო მოლაპარაკებები ისედაც ჩიხშია შესული და სანქციებს „უცნაური“ და „გაუმართლებელი“ უწოდა.
„გარე ზეწოლა არ აიძულებს ისრაელს, უარი თქვას თავისი არსებობისა და უსაფრთხოებისთვის ბრძოლაზე მტრების წინაშე, რომლებიც მის განადგურებას ცდილობენ“, - ნათქვამია განცხადებაში.
