დონალდ ტრამპი „დიფ სთეითს“ თუ დაამარცხებს, მსოფლიოში მშვიდობა იქნება, თუ ვერ დაამარცხებს და ამ ბრძოლაში წააგებს, ქართველები ვართ, ურდოებისთვის გაგვიძლია, ჩვენს ენას, სარწმუნოებას და მომავალს ყოველთვის დავიცავთ, – ამის შესახებ პარლამენტის დიასპორის საკითხთა კომიტეტის თავმჯდომარემ, ირაკლი ზარქუამ საქართველოს პირველ არხს განუცხადა.
„კონგრესმა არამეგობრული აქტი მიიღო. თავიდან, კანონპროექტში სხვა მოთხოვნები იყო წარმოდგენილი და შეცვალეს. თავიდან აქტი იმას ეყრდნობოდა, რომ თურმე, სააკაშვილი პოლიტპატიმარია. ახალი ადმინისტრაცია როდესაც მოვიდა, შინაარსი შეცვალეს და თქვეს, აქცენტი ჩინეთზე გავაკეთოთო და სააკაშვილი გააქრეს. თავიდან ბოლომდე შეუსაბამო არგუმენტებითა და უსამართლო მიდგომებით არის გაჯერებული. გვედავებიან, რომ ევროპულ კურსს გადავუხვიეთ და რატომ? თურმე, ჩინეთთან მოკავშირეობით ხელშეკრულება გააფორმეს და ანაკლიის პორტში ჩინელები შეიყვანესო. ანაკლიის პორტზე ვეხვეწებოდით, იქნებ, ამერიკელები დაინტერესებულიყვნენ და ინვესტიციები ჩაედოთ, განცხადებაც არ შემოუტანიათ. ჩინელებთან თვითონ ჩადიან, სტრატეგიული მოკავშირეობის ხელშეკრულებები დადეს, საფრანგეთი იქნება, უნგრეთი, ბრიტანეთი თუ იტალია. ეს მიუღებელი საქართველოსთვის არის?“, – განაცხადა ირაკლი ზარქუამ.
მისი თქმით, არის მცდელობა, საქართველო კლანჭებში მოაქციონ.
„მცდელობაა, რომ ეს პატარა ქვეყანა კლანჭებში მოაქციონ. რატომ? გეოპოლიტიკური მდგომარეობა აქვს და ყველას უნდა, საქართველო გავლენის ქვეშ ჰყავდეს. საქართველო თავისუფალია, როგორც არასოდეს. ბუნებრივია, რომ აქტის მხარდაჭერა არ გაგვიკვირდა, რადგან თავის დროზე მისი ხელმომწერები ტრამპის იმპიჩმენტს უჭერდნენ მხარს. ჩვენთან მიმართებაში რომ იგივე პოლიტიკა ექნებოდათ, ბუნებრივია. თუ ტრამპი „დიფ სთეითს“ დაამარცხებს, მსოფლიოში მშვიდობა იქნება. თუ ვერ დაამარცხებს და ამ ბრძოლაში წააგებს, ქართველები ვართ, ურდოებისთვის გაგვიძლია და ჩვენს ენას, სარწმუნოებას და მომავალს ყოველთვის დავიცავთ. ქართველი ხალხის როგორც არასოდეს, ისე გვჯერა და ჩვენს ქვეყანას ყოველთვის დავიცავთ“, – განაცხადა ირაკლი ზარქუამ.
