უკრაინის დასავლელი მოკავშირეები კიევისთვის Patriot-ის ტიპის საჰაერო თავდაცვის სისტემების გადაცემის შესახებ მოლაპარაკებებს აწარმოებენ და ივნისის ბოლოს ნატო-ს სამიტამდე შეთანხმების მიღწევას ცდილობენ. ამის შესახებ Reuters-ს ინფორმირებულმა წყარომ განუცხადა.
მისი თქმით, პოტენციურ მომწოდებლებს შორის არიან შეერთებული შტატები და საბერძნეთი.
სააგენტოს წყარომ არ დააკონკრეტა, თუ რა რაოდენობის ამერიკულ საზენიტო-სარაკეტო სისტემებზეა საუბარი.
უკრაინას სულ უფრო მეტი Patriot-ი სჭირდება.
13 აპრილს უკრაინის პრეზიდენტმა ვოლოდიმირ ზელენსკიმ გამოთქვა მზადყოფნა, 15 მილიარდ დოლარად შეიძინოს 10 ასეთი სისტემა, რათა დაიცვას ქალაქები რუსული ბალისტიკური რაკეტებისგან.
გუშინ, 4 მაისს, ამერიკელ ოფიციალურ პირებზე დაყრდნობით, წყაროებმა New York Times-ს განუცხადეს, რომ ზაფხულისთვის უკრაინამ უნდა მიიღოს კიდევ ერთი Patriot-ის სისტემა, რომელიც ამჟამად ისრაელშია ბაზირებული.
გარდა ამისა, დასავლელი მოკავშირეები განიხილავენ მსგავსი საჰაერო თავდაცვის სისტემის გერმანიიდან ან საბერძნეთიდან გადაცემას.
Patriot -ის ნებისმიერი მიწოდებისთვის აშშ-ის თანხმობაა საჭირო. ტრამპმა გაპრეზიდენტების შემდეგ საჯაროდ უარყო უკრაინის მოთხოვნები დამატებითი საჰაერო თავდაცვის სისტემების შესახებ. თუმცა, მოსალოდნელია, რომ მან აზრი შეიცვალოს რუსეთის მიერ 30-დღიანი ცეცხლის შეწყვეტის შესახებ შეთანხმების უარყოფის შემდეგ, რასაც უკრაინის ქალაქებზე კიდევ უფრო ინტენსიური დარტყმები მოჰყვა, რამაც მშვიდობიან მოსახლეობაში დიდი რაოდენობით მსხვერპლი გამოიწვია.
