უკრაინის მთავარი სადაზვერვო სამმართველო გამოეხმაურა სლოვაკეთის პრემიერ-მინისტრის, რობერტ ფიცოს განცხადებებს, რომელმაც „ქართული ლეგიონის“ მებრძოლები სლოვაკეთის საპროტესტო აქციებში მონაწილეობაში დაადანაშაულა და მათ უკრაინის სადაზვერვო სამმართველოს ქვეშ „დაქვემდებარებულები“ უწოდა.
„უკრაინის თავდაცვის სამინისტროს მთავარი სადაზვერვოს სამმართველო ოფიციალურად ავრცელებს ინფორმაციას, რომ მის სტრუქტურაში არ არსებობს ქვედანაყოფი სახელწოდებით „ქართული ეროვნული ლეგიონი“, - აღნიშნულია განცხადებაში.
უწყებაში აღნიშნავენ, რომ ჰიბრიდული და საინფორმაციო ოპერაციები, რომლებიც მიმართულია ევროპის ქვეყნებში სიტუაციის შელახვისკენ, უკრაინისთვის უკიდურესად სერიოზულ საფრთხეს წარმოადგენს.
დაზვერვის სამსახურმა ასევე ხაზგასმით აღნიშნა, რომ ქართული ლეგიონი არის მრავალეროვნული აქტიური ოპერაციული ქვედანაყოფი, რომელიც უშუალოდ მონაწილეობს ბრძოლებში ფრონტის ყველაზე ცხელ რაიონებში და არ ახორციელებს არანაირ ჰიბრიდულ ქმედებებს ევროკავშირის ტერიტორიაზე.
„ქართული ლეგიონის“ ლიდერის მამუკა მამულაშვილის მიმართ ფიცოს ბრალდებებთან დაკავშირებით, სამმართველოში განაცხადეს, რომ მას არანაირი კავშირი არ აქვს უკრაინის დაზვერვასთან და არ იღებს რაიმე დავალებას და ბრძანებას.
„ამ პირმა 2023 წლის აპრილში შეწყვიტა კონტრაქტი უკრაინის თავდაცვის სამინისტროს მთავარი სადაზვერვო სამმართველოს საერთაშორისო ლეგიონთან“, - ამბობენ სადაზვერვო სამსახურში.
უწყება ხაზგასმით აღნიშნავს, რომ ისინი მუდმივ კონტაქტსა და თანამშრომლობაში არიან კოლეგებთან ნატო-ს ქვეყნებიდან.
„ევროპელი პოლიტიკოსები მაქსიმალურად პასუხისმგებელნი უნდა იყვნენ თავიანთ სიტყვებზე, განსაკუთრებით მეგობარი ქვეყნების მიმართ ბრალდებებზე, რათა არ შეუქმნან მტრული პროპაგანდის საფუძველი“, - წერს უკრაინის მთავარი სადაზვერვო სამმართველო.
სლოვაკეთის ხელისუფლებამ უკრაინაში მებრძოლი „ქართულ ლეგიონის“ მეთაური, მამუკა მამულაშვილი ქვეყანაში შესაძლო სახელმწიფო გადატრიალების მცდელობაში დაადანაშაულა და მას ქვეყანაში შესვლა აუკრძალა.
