ანტარქიტიდის კონტინენტზე ისტორიაში პირველად Boeing 787 ტიპის სამგზავრო თვითმფრინავი დაეშვა. ამის შესახებ Sky News იუწყება.
"ისტორიული მომენტი Norse-სთვის. პირველი Boeing 787 Dreamliner, რომელიც დაეშვა ანტარქტიდაზე! ჩვენთვის დიდი პატივია ვიყოთ ამ ისტორიული მოვლენის ნაწილი", - განაცხადეს ავიაკომპანია Norse Atlantic Airways-ში, რომელმაც ისტორიული რეისი შეასრულა.
ვინაიდან, ანტარქტიდაში ჩვეულებრივი ასაფრენი ბილიკები არ არის, თვითმფრინავი კვლევითი სადგურის აეროდრომზე 3000 მეტრის სიგრძისა და 60 მეტრის სიგანის ყინულის ზოლზე დაეშვა.
ბორტზე იმყოფებოდა 45 მგზავრი - ნორვეგიის პოლარული ინსტიტუტის მკვლევარები და თანამშრომლები, ბორტზე ასევე მოთავსებული იყო 12 ტონა აღჭურვილობა.
მკვლევარებმა განაცხადეს, რომ ყოველწლიურად სრულდება ფრენები კონტინენტზე სხვადასხვა ზომის 10-მდე თვითმფრინავის დახმარებით, მაგრამ ბევრად უფრო დიდი თვითმფრინავების ფრენის შესაძლებლობას შეუძლია შეამციროს საჭირო მოგზაურობის რაოდენობა.
წარმატებული ფრენის მიუხედავად, ინსტიტუტი კონტინენტზე კომერციული ფრენების განხორციელებას არ გეგმავს.
