გაერო-სა და ჯანდაცვის მსოფლიო ორგანიზაციის წარმომადგენლები ღაზაში ალ-შიფას საავადმყოფოში იმყოფებოდნენ. ამის შესახებ ნათქვამია ჯანდაცვის მსოფლიო ორგანიზაციის ვებგვერდზე გამოქვეყნებულ განცხადებაში.
უსაფრთხოებიდან გამომდინარე შეზღუდული დროის გამო, ჯგუფმა საავადმყოფოში მხოლოდ ერთი საათი გაატარა, რომელსაც მათ "სიკვდილის ზონა" უწოდეს. ჯგუფის წევრებმა ნახეს დაბომბვის კვალი, ასევე მასობრივი საფლავი შესასვლელთან, სადაც მათივე თქმით, 80-ზე მეტი ადამიანი იყო დაკრძალული.
განცხადებაში აღნიშნულია, რომ სუფთა წყლის, საწვავის, მედიკამენტების, საკვებისა და სხვა აუცილებელი საჭიროებების ნაკლებობამ გამოიწვია ის, რომ ალ-შიფას ჰოსპიტალი - ოდესღაც უდიდესი, ყველაზე თანამედროვე და საუკეთესოდ აღჭურვილი საავადმყოფო ღაზის სექტორში - ფაქტობრივად დაიხურა და აღარ ფუნქციონირებს როგორც სამედიცინო დაწესებულება.
„უსაფრთხოებიდან გამომდინარე, პერსონალი ვერ ახერხებს საავადმყოფოში სამედიცინო ნარჩენების ეფექტურად უტილიზაციას - საავადმყოფოს დერეფნები და საავადმყოფოს მთელი ტერიტორია სამედიცინო და მყარი ნარჩენებით არის სავსე, რაც ზრდის დაბინძურების რისკს. პაციენტები და სამედიცინო პერსონალი შიშობენ მათი უსაფრთხოებისა და ჯანმრთელობის გამო და ითხოვენ ევაკუაციას“,- ნათქვამია ჯანდაცვის მსოფლიო ორგანიზაციის განცხადებაში.
ასევე განცხადებაში აღნიშნულია, რომ სტაციონარში რჩება საავადმყოფოს 25 თანამშრომელი და 291 პაციენტი, რამდენიმე პაციენტი ბოლო ორი დღის განმავლობაში სამედიცინო მომსახურების შეწყვეტის გამო გარდაიცვალა. პაციენტებს შორისაა კრიტიკულ მდგომარეობაში მყოფი 32 ჩვილი, ორი პაციენტი ინტენსიური თერაპიის განყოფილებაში, რომლებიც ხელოვნური ვენტილაციის გარეშე არიან და დიალიზზე მყოფი 22 პაციენტი, რომლებსაც სასიცოცხლო მნიშვნელობის მკურნალობა არ მიეწოდება.
