ისრაელის პრემიერ-მინისტრმა ბენიამინ ნეთანიაჰუმ განაცხადა, რომ არსებობდა სერიოზული მინიშნება, რომ „ჰამასის“ მებრძოლების მიერ ისრაელზე თავდასხმის დროს გატაცებული მძევლები ღაზის სექტორში, ალ-შიფას საავადმყოფოში იმყოფებოდნენ. ამის შესახებ ისრაელის პრემიერ-მინისტრმა ტელერახ CBS-ს განუცხადა.
„ეს იყო ერთ-ერთი მიზეზი, რის გამოც საავადმყოფოში შევედით“, – განაცხადა ნეთანიაჰუმ ინტერვიუში.
მისივე თქმით, ისრაელის ჯარები როდესაც საავადმყოფოში შევიდნენ, იქ მძევლები აღარ იყვნენ.
„ისინი რომ იქ ყოფილიყვნენ, გამოიყვანდნენ“, – აღნიშნა ნეთანიაჰუმ.
ისრაელის პრემიერ-მინისტრმა თქვა, რომ მის მთავრობას აქვს დაზვერვის მონაცემები მძევლების შესახებ, მაგრამ აღნიშნა, რომ უკეთესია ამ საკითხზე არ ილაპარაკოს.
ნეთანიაჰუმ ინტერვიუში ასევე თქვა, რომ „ჰამასის“ დამარცხების შემდეგ ისრაელი არ აპირებს ღაზის სექტორის ხელახლა ოკუპაციას, მაგრამ აპირებს მასზე სამხედრო კონტროლის შენარჩუნებას, რათა თავიდან აიცილოს ტერორისტული ორგანიზაციების აღორძინება.
„ჩვენ უნდა მოვახდინოთ ღაზის დემილიტარიზაცია და დერადიკალიზება“, - თქვა ისრაელის პრემიერ-მინისტრმა.
