ისრაელის პრემიერ-მინისტრმა ბენიამინ ნეთანიაჰუმ ამერიკულ ტელეარხ CBS News-თან ინტერვიუში განაცხადა, რომ ისრაელი ყველაფერს აკეთებს იმისათვის, რომ ღაზის სექტორში მშვიდობიან მოსახლეობას შორის დაღუპულების რაოდენობა მინიმუმამდე შემცირდეს, მაგრამ ძირითადად „ჰამასის ქმედებების“ გამო ჩვენი მცდელობა უშედეგოა.
„ყველა მშვიდობიანი მოქალაქის სიკვდილი ტრაგედიაა და ეს არ უნდა მომხდარიყო, ამიტომ ჩვენ ყველაფერს ვაკეთებთ იმისთვის, რომ მშვიდობიან მოსახლეობას საფრთხე თავიდან ავაცილოთ, მაგრამ „ჰამასი’ ყველაფერს აკეთებს იმისათვის, რომ ისინი დარტყმის ქვეშ დატოვონ“, - თქვა ბენიამინ ნეთანიაჰუმ CBS News-თან ინტერვიუში.
პრემიერ-მინისტრმა აღნიშნა, რომ კონკრეტულ ადგილზე იერიშის წინ ისრაელის არმია ავრცელებს ბუკლეტებს, აგზავნის სატელეფონო შეტყობინებეს და მოუწოდებს მშვიდობიანი მოქალაქეებს დატოვონ ტერიტორია. მისივე თქმით, ბევრი მათგანი ითვალისიწნებს გაფრთხილებას და ბევრი მიდის.
„ჩვენ ვეცდებით დავასრულოთ ეს სამუშაო მშვიდობიან მოსახლეობას შორის რაც შეიძლება ნაკლები მსხვერპლით. ეს არის ის, რის გაკეთებასაც ჩვენ ვცდილობთ: მინიმუმამდე დავიყვანოთ მშვიდობიანი მოსახლეობის მსხვერპლი. მაგრამ, სამწუხაროდ, ჩვენ ეს არ გამოგვდის, - განაცხადა ისრაელის პრემიერმა.
„ჰამასის“ მიერ კონტროლირებადი ღაზის ჯანდაცვის სამინისტროს მონაცემებით, ღაზის სექტორში ომის ერთი თვისა და ათი დღის განმავლობაში დაახლოებით 11 500 მცხოვრები უკვე დაიღუპა. სხვა დამოუკიდებელი წყაროებიდან ამ ეტაპზე მონაცემები არ არსებობს.
ნეთანიაჰუმ ინტერვიუში ასევე თქვა, რომ „ჰამასის“ დამარცხების შემდეგ ისრაელი არ აპირებს ღაზის სექტორის ხელახლა ოკუპაციას, მაგრამ აპირებს მასზე სამხედრო კონტროლის შენარჩუნებას, რათა თავიდან აიცილოს ტერორისტული ორგანიზაციების აღორძინება.
„ჩვენ უნდა მოვახდინოთ ღაზის დემილიტარიზაცია და დერადიკალიზება“, - თქვა ისრაელის პრემიერ-მინისტრმა.
