კატარის შუამავლობით გრძელდება მოლაპარაკება „ჰამასსა” და ისრაელს შორის მძევლების გათავისუფლებასთან დაკავშირებით.
შეთანხმება, რომელიც განიხილება და თანხმდება აშშ-სთან, გულისხმობს ღაზის სექტორიდან 50-მდე მძევლის გათავისუფლებას სამდღიანი ცეცხლის შეწყვეტის სანაცვლოდ. იუწყება სააგენტო Reuters.
როგორც სააგენტოს მოლაპარაკების შესახებ ინფორმირებულმა წყარომ განუცხადა, შეთანხმების თანახმად, რამდენიმე პალესტინელი ქალი და ბავშვი გათავისუფლდება ისრაელის ციხეებიდან, ხოლო ისრაელი გაზრდის ჰუმანიტარულ დახმარებას ღაზის სექტორში.
Reuters-ის ცნობით, „ჰამასი“ დათანხმდა შეთანხმების ზოგად მონახაზს, თუმცა ისრაელი - არა, ამიტომ კატარი ჯერ კიდევ აწარმოებს მოლაპარაკებებს დეტალებზე. უცნობია, შეთანხმების ფარგლებში რამდენ პალესტინელ ქალსა და ბავშვს გაათავისუფლებს ისრაელი ციხეებიდან.
როგორც მედია წერს, კატარს, რომელსაც გააჩნია ამბიციური საგარეო პოლიტიკური მიზნები, აქვს პირდაპირი კომუნიკაციის ხაზი „ჰამასთან“ და ისრაელთან. ამასთან, გარიგება დაავალდებულებს „ჰამასს“, წარადგინოს ღაზაში დარჩენილი ცოცხალი მძევლების სრული სია.
