ტერორისტული დაჯგუფება „ჰამასის“ მიერ გატაცებული მძევლების ოჯახების წევრებმა დაიწყეს ხუთდღიანი მარში თელავივიდან იერუსალიმისკენ, და მოითხოვეს მთავრობამ გააძლიეროს ძალისხმევა მძევლების გასათავისუფლებლად.
63-კილომეტრიან მსვლელობაში, რომელიც შაბათს, 18 ნოემბერს, პრემიერ-მინისტრ ბენიამინ ნეთანიაჰუს ოფისში უნდა დასრულდეს, ასზე მეტმა ადამიანმა მიიღო მონაწილეობა, იუწყება AFP.
საპროტესტო მსვლელობა ორგანიზებული იყო მძევლებისა და დაკარგულთა ოჯახების ფორუმის მიერ, რომელიც შეიქმნა 7 ოქტომბერს ისრაელზე ჰამასის თავდასხმის შემდეგ. განცხადებაში, ფორუმმა მოუწოდა ისრაელის მთავრობას გაავრცელოს ცნობა თუ რა მოთხოვნები წამოაყენა მძევლების გათავისუფლებასთან დაკავშირებით მოლაპარაკებების დროს.
ერთ-ერთი მძევლის ძმამ, დენი ელგარატმა, ხელისუფლება, დუმილის გამო, მძევლების ოჯახების მიმართ „ფსიქოლოგიურ ტერორში“ დაადანაშაულა. ელგარატმა უარყო მძევლების მხოლოდ ნაწილის გათავისუფლებაზე შეთანხმების შესაძლებლობა.
გასულ კვირას ისრაელის პრემიერ-მინისტრმა ბენიამინ ნეთანიაჰუმ ამერიკულ ტელეკომპანია NBC-ის ეთერში განაცხადა, რომ შესაძლოა მიაღწიონ შეთანხამებას მძევლების გათავისუფლების შესახებ. მეორე დღეს „ჰამასის“ სამხედრო ფრთამ ისრაელი დაადანაშაულა კატარის შუამავლობით მიმდინარე მოლაპარაკებების გაჭიანურებაში. „ჰამასი“ ითხოვს ისრაელის ციხეებში პალესტინელი ტყვეების გაცვლას მძევლებზე.
ამავდროულად, წითელი ჯვრის საერთაშორისო კომიტეტის (ICRC) პრეზიდენტი, მირჯანა სპოლიარიჩი ჟენევაში შეხვდა მძევლების ახლობლების ნაწილს. მოლაპარაკებებში ასევე მონაწილეობდნენ ისრაელის საგარეო საქმეთა მინისტრი ელი კოენი და ჯანდაცვის მინისტრი ურიელ ბუსო. შეხვედრის შემდეგ კოენმა პრესკონფერენციაზე განაცხადა, რომ წითელი ჯვრის ვერცერთმა წარმომადგენელმა ჯერ ვერ შეძლო მძევლებთან შეხვედრა.
