გერმანიის ქალაქ ჰამბურგის აეროპორტში შაბათს საღამოდან გრძელდება ოპერაცია 4 წლის გოგონას გასათავისუფლებლად, რომელიც მძევლად აიყვანა შეიარაღებულმა კაცმა, სავარაუდოდ მამამისმა. კაცი მანქანით ასაფრენ ბილიკზე შევიდა. იუწყება Bild.
ინციდენტი გერმანიის დროით 20:00 საათის შემდეგ დაიწყო, როდესაც ჰამბურგის აეროპორტის 1-ელ ტერმინალში სანომრე ნიშნის გარეშე ავტომობილი გამოჩნდა. მძღოლი მანქანით ასაფრენ ბილიკზე შეიჭრა და Turkish Airlines -ის სამგზავრო თვითმფრინავის გვერდით გაჩერდა.
მძღოლი 35 წლის კაცია ქვემო საქსონიიდან, მასთან ერთად მანქანაში 4 წლის გოგონა იმყოფება. წინასწარი მონაცემებით, ეს მისი ქალიშვილია - აეროპორტში მომხდარ ინციდენტამდე ცოტა ხნით ადრე მისმა მეუღლემ პოლიციას უთხრა, რომ კაცმა მისი შვილი წაიყვანა.
Bild-ის ცნობით, კაცს სურს, რომ თავისი ქალიშვილი თვითმფრინავით თურქეთში წაიყვანოს, თუმცა ცოლი ამის უფლებას არ აძლევს.
კაცს თან ცეცხლსასროლი იარაღი აქვს, რომლიდანაც რამდენჯერმე გაისროლა. გარდა ამისა, კაცმა მანქანიდან ორი მოლოტოვის კოქტეილი ისროლა, თვითმფრინავის დაწვის მიზნით.
ჰამბურგის აეროპორტმა 3200-ვე მგზავრისა და თანამშრომლების ევაკუაცია მოახდინა და მუშაობა შეაჩერა.
