გვინეის ყოფილი პრეზიდენტი მუსა დადის კამარა ციხიდან გაიქცა. ამის შესახებ ქვეყნის იუსტიციის მინისტრმა ჩარლზ რაითმა განაცხადა.
მისი თქმით, ციხეს, რომელიც ქალაქ კონაკრიში მდებარეობს, დილის საათებში შეიარაღებული პირები თავს დაესხნენ. „გვინეის ექსპრეზიდენტმა ციხიდან გაქცევა სხვა ორ პატიმართან ერთად შეძლო“, - თქვა იუსტიციის მინისტრმა.
კამარა გვინეის ხელისუფლების სათავეში სამხედრო გადატრიალების შედეგად 2008 წელს მივიდა. ის 2022 წლის სექტემბერში დააპატიმრეს კონაკრის სტადიონზე მასობრივი მკვლელობის დაგეგმვისთვის. 2009 წლის სექტემბერში კონაკრის სტადიონზე 157 ადამიანი მოკლეს, რომლებიც ანტისამთავრობო დემონსტრაციაში მონაწილეობდნენ.
