„ჰამასის“ მტკიცებით, ირანი დაეხმარა მას, ისრაელზე რაკეტებითა და უპილოტო თვითმფრინავებით თავდასხმის განხორციელებაში. ამის შესახებ BBC იუწყება.
მანამდე, აშშ-ს სახელმწიფო მდივანმა, ენტონი ბლინკენმა განაცხადა, რომ აშშ-ს ჯერ არ აქვს ირანის პირდაპირი ჩართულობის მტკიცებულება.
თავად ირანი ისრაელზე თავდასხმასთან რაიმე კავშირს უარყოფს. გაეროში ირანის წარმომადგემლობა აცხადებს, რომ არ მონაწილეობდა ისრაელზე „ჰამასის“ თავდასხმის დაგეგმვაში.
„პალესტინის მიერ გადამწყვეტი ზომები წარმოადგენს კანონიერ ქმედებას შვიდი ათწლეულის განმავლობაში არალეგიტიმური სიონისტური რეჟიმის მიერ განხორციელებული მჩაგვრელი ოკუპაციისა და საზარელი დანაშაულების წინააღმდეგ.
ჩვენ მტკიცედ ვუჭერთ მხარს პალესტინას, თუმცა არ ვმონაწილეობთ პალესტინის ღონისძიებებში, რადგან გადაწყვეტილებებს იღებს მხოლოდ თავად პალესტინა“, - განაცხადეს ირანის წარმომადგენლობაში.
ღაზას სექტორიდან ისრაელზე სარაკეტო თავდასხმა 7 ოქტომბერს, გამთენიისას განხორციელდა. თავდასხმაზე პასუხისმგებლობა მოძრაობა „ჰამასმა“ აიღო. ბოლო მონაცემებით. ისრაელის ტერიტორიაზე დაღუპულთა რაოდენობა 700-ს აჭარბებს.
