"ვისურვებდი, რომ მემორიალის გახსნა გამხდარიყო ჩვენი სახელმწიფო ინტერესების გათვალისწინებით, ორ ქვეყანას შორის ურთიერთობების ნორმალიზების დასაწყისი", - ამის შესახებ დემოკრატიული მოძრაობის" ლიდერმა ნინო ბურჯანაძემ რუსეთის პრემიერ-მინისტრ ვლადიმერ პუტინთან შეხვედრისას განაცხადა.
მისი თქმით, მხოლოდ ურთიერთობების ნორმალიზება შეიძლება გახდეს საქართველო-რუსეთს შორის არსებული პრობლემების მოგვარებისა და კეთილმეზობლური ურთიერთობების აღდგენის საფუძველი, რაც ერთმნიშვნელოვნად ორივე ქვეყნის ინტერესშია.
ბურჯანაძისა და პუტინის შეხვედრის დეტალებთან დაკავშირებით ინფორმაციას თავად "დემოკრატიული მოძრაობის" პრესსამსახური ავრცელებს.
შეგახსენებთ, რომ დღეს, 21 დეკემბერს, "დემოკრატიული მოძრაობის" ლიდერმა, ნინო ბურჯანაძემ, "პოკლონაია გორაზე" მეორე მსოფლიო ომში დაღუპული ქართველი მებრძოლებისადმი მიძღვნილი მემორიალის გახსნის ცერემონიალში მიიღო მონაწილეობა.
დღესვე, მან პირისპირ შეხვედრა გამართა რუსეთის პრემიერ-მინისტრთან, ვლადიმერ პუტინთან.
