რუსეთის საგარეო საქმეთა სამინისტროს პრესსპიკერმა მარია ზახაროვამ განაცხადა, რომ ვაშინგტონი და ბრიუსელი ზეწოლას ახდენენ ერევანზე, რათა სომხეთის ხელისუფლებამ კოლექტიური უსაფრთხოების ხელშეკრულების ორგანიზაცია (ОДКБ) დატოვოს.
„მიღებული ინფორმაციით, ვაშინგტონი და ბრიუსელი არწმუნებენ სომხეთის ხელმძღვანელობას გავიდნენ კოლექტიური უსაფრთხოების ხელშეკრულების ორგანიზაციიიდან, დააჩქარონ თანამშრომლობა ნატო-სთან, გადახედონ სამხედრო-ტექნიკურ თანამშრომლობას და ხელი მოაწერონ სამშვიდობო ხელშეკრულებას აზერბაიჯანთან ყარაბაღელი სომხების უფლებებისა და უსაფრთხოების გათვალისწინების გარეშე. “ – განაცხადა ზახაროვამ.
მისი თქმით, მოსკოვი ხედავს „რა დესტრუქციული ფანატიზმით ამუშავებენ ამერიკელები ერევანს“. მისი თქმით, ასეთი „დამუშავება“ განხორციელდა აშშ-ს საერთაშორისო განვითარების სააგენტოს ხელმძღვანელის, სამანტა პაუერის და სახელმწიფო მდივნის მოადგილის იური კიმის ბოლო ვიზიტების დროს.
ზახაროვამ განაცხადა, რომ დასავლეთის ქვეყნებმა, ამ მიზნების მისაღწევად, დაივიწყეს ღირებულებები და ადამიანის უფლებები.
ბოლო დროს სომხეთსა და კოლექტიური უსაფრთხოების ხელშეკრულების ორგანიზაციას შორის ურთიერთობები მნიშვნელოვნად გაცივდა. 2020 წელს მთიანი ყარაბაღის ომის შემდეგ კოლექტიური უსაფრთხოების ხელშეკრულების ორგანიზაციას ერევანისთვის დახმარება ფაქტობრივად არ გაუწევია.
