ქართული პარტიის ერთ-ერთი ლიდერი ლევან გაჩეჩილაძე გაზეთ ასავალ-დასავალში გამოქვეყნებულ სკანდალურ სტატიებს გამოეხმაურა.
მისი თქმით, ეს ყველაფერი ბურჯანაძეების ოჯახისა და ხელისუფლების ინტერესებიდან გამომდინარე ხდება.
"ოპოზიციის მისამართით აუგი არასდროს მითქვამს. ახლა კი ჩემსა და ქართულ პარტიაზე ავადმყოფური და ბინძური კამპანია ხორციელდება, რომელსაც ბურჯანაძეების ოჯახი ხელისუფლების ინტერესებიდან გამომდინარე აწარმოებს. მივმართავ საზოგადოებას, დაარქვან ყველაფერს თავისი სახელი, თორემ ბრძოლის მოგება ძალიან გაგვიჭირდება", - განაცხადა გაჩეჩილაძემ პარტიის ოფისში გამართულ ბრიფინგზე.
შეგახსენებთ, რომ "ასავალ-დასავალსა" და გაჩეჩილაძეს შორის დაპირისპირება გრძელდება. გაზეთმა "წყაროს" ვინაობა დაასახელა და მასთან ინტერვიუ გამოაქვეყნა. "ასავალ-დასავალის" ინფორმატორი სასაზღვრო პოლიციის ყოფილი უფროსი ბადრი ბიწაძე აღმოჩნდა. ის სკანდალური საქმის მეორე ნაწილში ამტკიცებს, რომ 2008 წელს, საპრეზიდენტო არჩევნების დასრულების შემდეგ, მიხეილ სააკაშვილისა და ლევან გაჩეჩილაძის შეხვედრას, რომელიც შავნაბადაზე გაიმართა, თავადაც ესწრებოდა.
"გრეჩიხა უმტკიცებს სააკაშვილს, რომ შეუძლია გადმოაყუდოს. სააკაშვილი ეუბნება, რა გინდა, რა გაგიკეთო? "გრეჩიხა" ამ დროს ხმას არ იღებს და როგორც მერე ვნახე, ფურცელზე უწერდა თავის პირობებს. "გრეჩიხა" რომ წავიდა, მან ფურცელი გამომიწოდა და აჰა, წაიკითხე, რა მომთხოვაო", - აღნიშნავს ბიწაძე.
