ქალი პოლიციელები ისეთივე თავდადებით შრომობენ ყოველდღიურად ჩვენი საზოგადოების უსაფრთხოებისა და მართლწესრიგის დასაცავად, როგორც კაცი პოლიციელები, – ამის შესახებ ჟურნალისტებს პარლამენტის ადამიანის უფლებათა დაცვის კომიტეტის თავმჯდომარე სოფო კილაძემ განუცხადა.
მისი თქმით, „ნაციონალური მოძრაობის“ წევრები და ზოგიერთი პარტიული ტელევიზია მიზანმიმართულად ავრცელებს სიცრუეს, თითქოს ხელისუფლებამ გურჯაანში, სასამართლოს წინ მხოლოდ ქალი პოლიციელები დააყენა.
„თუმცა, ამ სიცრუეზე მეტად შემაშფოთებელია ის ფაქტი, რომ „ნაცმოძრაობა“ ქალებსა და ბავშვებს უკიდურესად დისკრიმინაციული გამონათქვამით მოიხსენიებს. ქალი, დედა, ქვეყნის სიძლიერის სიმბოლოდ ითვლებოდა საუკუნეების განმავლობაში და მას არანაკლები წვლილი მიუძღვის ჩვენი ქვეყნის ისტორიაში. ამ პოლიტიკოსების მიერ ბავშვისა და ქალის დაკნინების მცდელობა მხდალად და ლაჩრად სწორედ ამ უღირსი, დისკრიმინაციული განცხადების გამკეთებელს წარმოაჩენს, რომელიც ცდილობს, ბავშვი და ქალი დააკნინოს“, – განაცხადა კილაძემ.
ცნობისთვის, გაერთიანებული ოპოზიციის წევრმა ზაალ უდუმაშვილმა გურჯაანის რაიონულ სასამართლოსთან გამართულ აქციაზე განაცხადა, რომ ხელისუფლებამ წინა რიგებში ქალბატონები ჩაამწკრივა, შემდეგ პროცესზე კი, შესაძლოა, პატარა ბავშვებს ჩააცვან პოლიციის ფორმები.