9 ნოემბერს მოძრაობა "სამართლიანი საქართველოსთვის" ჩოხატაურის რაიონული ორგანიზაცია დაფუძნდა. დამფუძნებელ კონფერენციაში 185 დელეგატი მონაწილეობდა. შეკრებაზე სიტყვით გამოვიდნენ მოძრაობის ლიდერი ზურაბ ნოღაიდელი და პარტნიორი ორგანიზაცია "ქრისტიანული საქართველოს" ხელმძღვანელი ავთანდილ დავითაია.
ნოღაიდელმა ყურადღება გაამახვილა მიხეილ სააკაშვილის რეჟიმის შეცვლის აუცილებლობაზე, ქვეყნის გამთლიანების წინაპირობებზე, საპარლამენტო მოდელზე გადასვლის მიზანშეწონილობაზე და ეკონომიკაში შექმნილ კატასტროფულ მდგომარეობაზე. მან მოუწოდა ჩოხატაურის მოსახლეობას, აქტიურად ითანამშრომლონ მოძრაობის ახლად გახსნილ ოფისთან და რაიონული ორგანიზაციის ხელმძღვანელებს საკუთარი იდეები და წინადადებები მიაწოდონ.
"ჩვენ ერთად უნდა გადავარჩინოთ ქვეყანა", _ აღნიშნა ნოღაიდელმა.
კონფერენციის დელეგატებმა აირჩიეს მოძრაობა "სამართლიანი საქართველოსთვის" ჩოხატაურის რაიონული ორგანიზაციის გამგეობა 7 კაცის შემადგენლობით.
