გურჯაანში მდებარე კურორტი „ახტალა", რომელიც საქართველოში ტალახით სამკურნალო ერთადერთი კურორტია, შესაძლოა, არაბებმა შეიძინონ. კახეთის საინფორმაციო ცენტრის ინფორმაციით, არაბი ინვესტორების ვიზიტი გურჯაანში ამ დღეებში იგეგმება.
ს/ს კურორტ „ახტალის" დირექტორი გოგა უტიაშვილი კურორტის გასხვისებას არ გამორიცხავს. მისი თქმით, ინვესტიციის განხორციელება აუცილებელიც არის. კურორტი „ახტალა" ამ დრომდე სახელმწიფო საკუთრებაშია.
ახტალა ფსევდოვულკანური ტალახის საბადოა. ახტალის ტალახს მრავალგზის სამკურნალო თვისებები გააჩნია. ამ უნიკალური თვისებების გამო ახტალაზე 1924 წელს აშენდა ტალახის სამკურნალო კოტეჯები. 1931-1932 წლებში აგებულ იქნა სანატორიუმი, ხოლო 1935 წელს ამ კომპლექსს დაემატა ორსართულიანი პოლიკლინიკა.
შეგახსენებთ, რომ ახტალის სანატორიუმში მცხოვრები აფხაზეთიდან დევნილები, კურორტის ადმინისტრაციის მოთხოვნის საფუძველზე, პოლიციამ გასულ კვირას იძულებითი წესით გაასახლა.
