"ახალი მემარჯვენეების" ლიდერის, დავით გამყრელიძის შეფასებით, "ალიანსი საქართველოსთვის" დაშლის მიზეზი ქართული საზოგადოებაც იყო, რომელიც დიდი გაერთიანებისთვის მზად არ აღმოჩნდა.
"მას შემდეგ, რაც ჩვენ გავერთიანდით, ჟურნალისტები და საზოგადოება ამბობდა, რომ "ახალმა მემარჯვენეებმა" და "რესპუბლიკელებმა" - ურეიტინგო პარტიებმა ირაკლი ალასანიას ამოფარება გადაწყვიტეს და ამით რეიტინგის შენარჩუნებაო. რაც აბსოლუტური აბსურდია. "ახალ მემარჯვენეებს" არანაირი პრობლემა არ გვაქვს და ამას საზოგადოებას მალე დავუმტკიცებთ. ჩვენ სექტემბერში გვექნება დიდი ყრილობა, სადაც ჩვენს მომავალ გეგმებზე ვისაუბრებთ", - განაცხადა გამყრელიძემ.
მისივე თქმით, მისი სურვილი იყო, რომ იმ ოთხი პარტიის ბაზაზე, რომლებიც "ალიანსში" შედიოდნენ, ერთი დიდი ევროპული დონის, მკაცრად სტრუქტურირებული, შიდა დემოკრატიის მქონე პარტია ჩამოყალიბებულიყო, თუმცა "ამისთვის არც საზოგადოების დაკვეთა არსებობდა და არც "ალიანსში" შემავალი ლიდერების სურვილი".
