როდესაც ჟურნალისტმა აუხსნა, რომ სააკაშვილი საქართველოს პრეზიდენტია, კადიროვმა შეურაცხყოფად მიიღო და განაცხადა, რომ მისთვის არ შეედარებინათ. ამის შემდეგ ჟურნალისტი იძულებული გახდა შეკითხვისთვის სხვა ფორმულირება მიეცა და სააკაშვილი მაგალითად არ მოეყვანა.

აღსანიშნავია, რომ კადიროვს მიხეილ სააკაშვილის არსებობა რუსეთ-საქართველოს აგვისტოს ომის დროს არ დავიწყებია და მისი განადგურებით იმუქრებოდა.

შეგახსენებთ, რომ საქართველოს ამჟამინდელი პრეზიდენტი, მიხეილ სააკაშვილი, კიევის საერთაშორისო ურთიერთობების ინსტიტუტის წარჩინებით დამთავრების შემდეგ ამერიკის შეერთებულ შტატებში გაემგზავრა და კოლუმბიის უნივერსიტეტში, ედმუნდ მასკის პროგრამით ჩაირიცხა. 1995 წელს მაგისტრის ხარისხი სამართლის განხრით მიიღო. 1995-1996 წლებში ვაშინგტონში, სწავლობდა ჯორჯ ვაშინგტონის უნივერსიტეტის სამართლის ეროვნული ცენტრის დოქტორანტურაში. 1995 წელს იგი ნიუ-იორკის ადვოკატურაში მიიღეს და თითქმის ერთი წლის განმავლობაში ეუფლებოდა ბიზნესსამართალს პეტერსონთან, ბელკნაფთან, ვებთან და ტაილერთან. ყოფილი საბჭოთა კავშირიდან იგი პირველი მოქალაქე გახდა, რომელმაც 1995 წელს მიიღო საპატიო დიპლომი ადამიანის უფლებების შედარებით სამართალში, სტრასბურგის ადამიანთა უფლებების საერთაშორისო ინსტიტუტში.

რაც შეეხება ჩეჩნეთის პრეზიდენტ რამზან კადიროვს, იგი ახმედ კადიროვის შვილია, რომელიც ჩეჩნეთის დამოუკიდებლობისთვის ე. წ. ბოევიკებთან ერთად იბრძოდა, მოგვიანებით კი რუსეთის ხელისუფლების მხარეზე გადავიდა. რამზან კადიროვმა მშობლიურ სოფელ ცენტორან-იუტში დაამთავრა საშუალო სკოლა, რის შემდეგაც სწავლა მახაჩკალის ბიზნესისა და სამართლის ინსტიტუტში განაგრძო, თუმცა "ნოვაია გაზეტასთან" საუბრისას მან თავისი სადიპლომო ნამუშევრის თემა ვერ დაასახელა, ასევე ჟურნალისტს ვერ უპასუხა კითხვაზე, კონკრეტულად რომელი დარგის სპეციალობაზე სწვალობდა. ჩეჩნეთის პირველი ომის დროს კადიროვი მამასთან ერთად რუსეთის წინაღმდეგ იბრძოდა, თუმცა 1999 წელს იგი კრემლის მხარეს გადავიდა. ჩეჩენი მებრძოლები მამა-შვილ კადიროვებს სამშობლოს ღალატში ადანაშაულებენ.