რუსეთი უახლოეს მომავალში ჩრდილოკავკასიაში თავისი სამხედრო კონტიგენტის რაოდენობას ოთხჯერ გაზრდის. ამის შესახებ წერს გაზეთი "ნეზავისიმაია გაზეტა" თავის დღევანდელ ნომერში ჯარში არსებულ წყაროებზე დაყრდნობით.
მათი ინფორმაციით, როგორც რამდენიმე ხნის წინ ჟურნალისტებისთვის გახდა ცნობილი, ახლახან მოსკოვის ოლქის ქალაქ დმიტროვოდან როსტოვის ოლქის დასახლებულ პუნქტ მილეროვოში 474-ე მოტომსროლელი საავტომობილო ბატალიონის გადასროლა მოხდა. ამას გარდა, ჩეჩნურ დასახლებულ პუნქტ ბორზოიში, მე-8 ცალკეული სამთო-მოტომსროლელი ბრიგადის ფორმირება მოხდა, ხოლო ვლადიკავკაზში 58-ე არმიის ბაზაზე ყალიბდება ოპერატიული სარდლობა, რომლის შემადგენლობაში შვიდი მოტომსროლელი და ერთი სატანკო ბრიგადა შევა.
რუსული მედია იუწყება, რომ ჩრდილო კავკასიაში სამხედრო კონტიგენტის გაძლიერებაში მონაწილეობას მიიღებენ რუსეთის შს სამინისტროს შინაგანი ჯარების მებრძოლებიც.
"ნეზავისიმაია გაზეტას" ინფორმაციით, ჩრდილო კავკასიაში სამხედრო ძალის გაძლიერება დაკავშირებულია საქართველოს მხრიდან მოსალოდნელი აგრესიის უკუგდებასთან. გაძლიერებული სამხედრო კონტიგენტი ასევე გამოყენებული იქნება ადგილობრივ ბოევიკებთან საბრძოლველად.
