შიდა ქართლის სამხარეო სამმართველოს უფროსი ვლადიმერ ჯუღელი სააგენტო "ჯი-ეიჩ-ენთან" საუბარში ოს სეპარატისტთა მიერ გავრცელებულ ინფორმაციას, ქართველი სამხედროების მიერ ე. წ. სამხრეთ ოსეთის სახელმწიფო საზღვრის გადალახვის შესახებ კატეგორიულად უარყოფს.
ჯუღელი აცხადებს, რომ სეპარატისტების მიერ კონტროლირებად ტერიტორიაზე ქარული მოსახლეობის საქონელი გადავიდა, რომლის უკან გამოსარეკად მწყემსები გადავიდნენ.
"ქართველი სამხედროები იქ არ ყოფილან, მწყემსები საქონელის მოსაბრუნებლად გადავიდნენ. სეპარატისტებმა მწყემსების დანახვისას ჰაერში რამდენჯერმე გაისროლეს. ახლა კი სროლის გასამართლებლად აცხადებენ, რომ იქ ქართული სამხედრო მანქანები იყო გადასული", _ აცხადებს ჯუღელი "ჯი-ეიჩ-ენთან" საუბარში.
შეგახსნებთ, რომ ცხინვალის რეგიონის კრიმინალური მთავრობის ე. წ. თავდაცვის მინისტრის მოადგილე იბრაგიმ გასეევი აცხადებს, რომ ქართველი სამხედროების სამმა სამხედრო ავტომობილმა _ ორმა ჯავშანმანქანა "კობრამ" და ერთმა "პიკაპმა" ე. წ. სამხრეთ ოსეთის სახელმწიფო საზღვარი დაარღვია და "მათი" ტერიტორიის 150 მეტრის სიღრმეში შევიდა. გასეევის ინფორმაციით, ოსი სამხედროებისმიერ ჰაერში გასროლის შედეგად "ქართველი სამხედროების მანქანებმა სამხრეთ ოსეთის ტერიტორია დატოვეს".
