პოლიტოლოგი ირაკლი სესიაშვილი არ გამორიცხავს, რომ ნიკოლოზ გილაურის მისამართით ლევან ვარშალომიძის მიერ დღეს გამოთქმული პროტესტის უკან საქართველოს პრემიერ-მინისტრის შეცვლის გეგმა მზადდებოდეს.
"ნაციონალური მოძრაობა" ერთმანეთს შეთანხმების გარეშე არ უპირისპირდება და თუ მთავრობის რომელიმე წევრის წინააღმდეგ განცხადება კეთდება, ეს ნიშნავს, რომ ის თავისთავად ხელისუფლების ძირითადი მმართველების პოლიტიკური ნებაა. აქედან გამომდინარე, არაა გამორიცხული, რომ გილაურის შეცვლა მოსალოდნელი იყოს", - განუცხადა სესიაშვილმა "ჯი-ეიჩ-ენს", თუმცა ვინ შეიძლება ჩაანაცვლოს ქვეყნის აღმასრულებელი ხელისუფლების ხელმძღვანელი, პროგნოზირება უჭირს.
შეგახსენებთ, რომ აჭარის ავტონომიური მთავრობის თავმჯდომარე ლევან ვარშალომიძე პრემიერ-მინისტრ გილაურს დღეს ღიად დაუპირისპირდა.
როგორც ვარშალომიძემ საგანგებოდ გამართულ პრესკონფერენციაზე განაცხადა, აჭარისთვის გაზრდილი ადმინისტრაციული უფლებამოსილების დელეგირების თაობაზე პრემიერ-მინისტრისთვის მის მიერ 2009 წლის ივლისიდან გაგზავნილი ყველა წერილი უპასუხოდ დარჩა.
"აჭარის მთავრობა და სამინისტროები ვერ იღებენ უმარტივეს ტექნიკურ გადაწყვეტილებებსაც კი და ველოდებით რომელიმე თბილისელი ბიუროკტარის მიერ მისთვის უცნობ დოკუმენტზე ხელმოწერებს. ეს ყველაფერი მიუღებელი, გაუმართლებელი და აღმაშფოთებელია. ყველას უნდა გვესმოდეს, რომ აჭარის ადგილობრივი ხელისუფლებისთვის ჩვენ მიერ მოთხოვნილი უფლებამოსილების გადმოცემა არა მარტო გაამარტივებს და დააჩქარებს მომსახურებას, არამედ ხელს შეუწყობს ადგილობრივ მეწარმეებს. გაუგებარია, რატომ არ მოხდა სათანადო რეაგირებები პრემიერ-მინისტრის სახელზე გაგზავნილ წერილებზე, რომელსაც ჩემი ხელმოწერა აქვს. როგორც ჩანს, წერილობითი ფორმა არაა საკმარისი", - განაცხადა ვარშალომიძემ.
