ყაზახეთის პრემიერ-მინისტრი კარიმ მასიმოვი ყირგიზეთში მიმდინარე მოვლენებში რუსული კვალის არსებობას გამორიცხავს.
შესაბამისი განცხადება ყაზახეთის მთავრობის თავმჯდომარემ დღეს, ასტანაში, ქართველ კოლეგა ნიკა გილაურთან შეხვედრის შემდეგ გამართულ ერთობლივ პრესკონფერენციაზე განაცხადა.
როგორც "ჯი-ეიჩ-ენის" კორესპონდენტი იტყობინება, კარიმ მასიმოვმა ისიც აღნიშნა, რომ ყაზახეთი მეზობელ სახელმწიფოში სიტუაციის დასტაბილურებისთვის ყველაფერს გააკეთებს.
"მართალია ბიშკეკში მდგომარეობა დაძაბულია და ვადასტურებ იმასაც, რომ ყაზახეთმა ყირგიზეთთან სახელმწიფო საზღვარი დროებით ჩაკეტა, მაგრამ შეშფოთების საფუძველი არ არსებობს. საზღვრის ჩაკეტვა უსაფრთხოების მიზნებითაა ნაკარნახევი და იგი მაშინ გაიხსნება, როდესაც სიტუაცია დაწყნარდება", - განაცხადა ყაზახეთის პრემიერ მინისტრმა.
ამასთან, მისივე თქმით, ყაზახეთმა, რომელიც ეუთოს ამჟამინდელი თავმჯდომარე ქვეყანაა, ყირგიზეთში უკვე გააგზავნა თავისი მთავრობის წარმომადგენელი, რომელიც ადგილზე ცდილობს სიტუაციის გარკვევას და ყველაფერს აკეთებს მდგომარეობის სტაბილურობისათვის.
შეგახსენებთ, რომ საქართველოს სამთავრობო დელეგაცია, რომელსაც პრემიერი ნიკა გილაური ხელმძღვანელობდა ასტანაში სამუშაო ვიზიტით გუშინ გაემგზავრა.
