დღეს, 15 მარტს, კომუნიკაციების ეროვნული კომისიის თავმჯდომარის მოწვევით კომისიის საგანგებო სხდომა გაიმართება, რომელზეც ტელეკომპანია "იმედის" 13 მარტის გადაცემა შეფასდება.
როგორც კომისიის ოფიციალურ ვებგვერდზე გამოქვეყნებულ განცხადებაშია ნათქვამი,. სხდომაზე ~მოდელირებული ქრონიკა~ სამართლებრივი თვალსაზრისით შეფასდება, აგრეთვე დაიგეგმება პრევენციული ღონისძიებები.
~კომუნიკაციების ეროვნული კომისია ითვალისწინებს და პატივს სცემს თითოეული მაუწყებლის სარედაქციო დამოუკიდებლობის პრინციპს, მაგრამ ამავდროულად კატეგორიულად მოითხოვს ყველა სამაუწყებლო კომპანიებისგან, განუხრელად დაიცვან "მაუწყებელთა ქვეცის კოდექსი", თავი აარიდონ მაყურებელთა და მსმენელთა შეცდომაში შეყვანას, უზრუნველყონ ზუსტი და ჯეროვანი ინფორმაციის გადაცემა~, - ნათქვამია კომისიის განცხადებაში.
აქვე განმარტებულია, რომ 13 მარტს, ტელეკომპანია "იმედის" ეთერში გადაცემული პროგრამა "სპეციალური რეპორტაჟი", რომელიც საინფორმაციო გამოშვება "ქრონიკასაც" შეიცავდა, კონსტრუირებული იყო "მაუწყებელთა ქცევის კოდექსის" მე-13 მუხლის, მე-5 პუნქტის უხეში დარღვევით.
~შედეგად მაყურებელთა მნიშვნელოვანი ნაწილი შეცდომაში იქნა შეყვანილი. საქართველოს კომუნიკაციების ეროვნული კომისიის თავმჯდომარის და კომისიის წევრების შეფასებით, აღნიშნული წარმოადგენდა ტელეკომპანიის შეცდომას და უპასუხისმგებლო დამოკიდებულებას "მაუწყებელთა ქცევის კოდექსის" მოთხოვნების დაცვის მიმართ~, - აცხადებს კომუნიკაციების ეროვნული კომისია.
ტელეკომპანია "იმედის" ეთერით 13 მარტს ~ქრონიკის" "მოდელირებული გამოშვება" გავიდა, სადაც 2010 წლის 7 ივნისის მოვლენები ისე იყო წარმოდგენილი, თითქოს ოპოზიციამ არჩევნები წააგო, აჯანყდა, ამით რუსეთმა ისარგებლა და საქართველოს სრული ანექსია განახორციელა, გავრცელდა ინფორმაცია საქართველოს პრეზიდენტის ლიკვიდაციის შესახებ. ტელეკომპანია "იმედის" ვერსიით, ოპოზიციის ნაწილი რუსეთს საქართველოს ანექსიაში დაეხმარა.
