სოფელ ვალეში სამლოცველოსთან კათოლიკური ხატები და წიგნები დაწვეს, - ამის შესახებ თვითმხილველი შოთა გიქოშვილი Facebook-ის პირად გვერდზე წერს.
მისი თქმით, ეს აშკარა ვანდალიზმი და ღია დისკრიმინაციაა.
"დღეს, 2018 წლის 12 მარტს, დაახლოებით საღამოს 18:00 საათზე ერთმა ნაცნობმა დამირეკა და მითხრა, რომ ვალეში, წმიდა ნინოს სახელობის სამლოცველოსთან, რომელიც გზის პირას დგას და იქ ინახება სხვადასხვა აღმსარებლობის ლოცვის წიგნები, ხატები, ჯვრები და ა.შ, რატომღაც კათოლიკური ლოცვის წიგნებს და ხატებს ეკლესიის წინ ცეცხლი ჰქონდა მოკიდებული. არ მინდა ცუდად ვიფიქრო ვინმეზე, არ მინდა, რომ ვინმეს შევეხო, მაგრამ გამომდინარე რეალობიდან სხვა გზა არ მრჩება გარდა იმისა, რომ ვიფიქრო ამ საქმის ჩადენის მიზანმიმართულობაზე.
მე ვეძებე დამწვარ წიგნებსა და ხატებში, თუმცა მხოლოდ და მხოლოდ კათოლიკური ეკლესიის ქართული და სომხური წიგნები და ხატები იყო დამწვარი.
თქვენ თავად განსაჯეთ, რა ჰქვია ამ საქციელს. მე კი ვიტყვი, რომ ეს არის აშკარა ვანდალიზმი და ღია დისკრიმინაცია", - წერს თვითმხილველი.