საქართველომ რუსეთს გადასცა ტერორისტულ დანაშაულში ბრალდებული, რუსეთის ფედერაციის მოქალაქე და ეთნიკურად ჩეჩენი რამზან ახიადოვი. აღნიშნული შესახებ განაცხადა საქართველოს იუსტიციის მინისტრმა თეა წულუკიანმა.
თეა წულუკიანის თქმით, რაზმან ახიადოვის ექსტრადირება დღეს, 19 სექტემბერს განხორციელდა.
რამზან ახიადოვი რუსეთის მიერ ტერორისტულ დანაშაულშია ბრალდებული და მას ინტერპოლით ეძებდა.
"ის ჩვენთან თურქეთიდან შემოვიდა, სადაც ასევე უწყობდა ხელს ტერორისტული ორგანიზაციის [ისლამური სახელმწიფო] საქმიანობას, ამაზე მეტს ამ საქმეზე ვერ ვიტყვი. ტერორიზმთან და საერთაშორისო დანაშაულთან ბრძოლა იყო, არის და იქნება ჩვენი სახელმწიფოს პრიორიტეტი ჩვენივე სახელმწიფოს უსაფრთხოებიდან გამომდინარე", - თქვა თეა წულუკიანმა.
იუსტიციის მინისტრის განცხადებით, ვიდრე რაზმან ახიადოვის რუსეთში ექსტრადირების გადაწყვეტილებას მიიღებდნენ, დარწმუნდნენ, რომ ბრალდებულს რუსეთში არ დაემუქრებოდა წამება ან არაადამიანური მოპყრობა. ამისათვის, რუსეთის ხელისუფლებამ წერილობითი გარანტიებიც კი გასცა.
"რაც შეეხება ადამიანის უფლებებს, ჩემთვის პირადად, როგორც სტრასბურგის სასამართლოს ყოფილი იურისტისთვის თითოეული ჩეჩენი, თითოეული ქისტის, ჩვენი მოქალაქის თუ სხვა ქვეყნის იყო პრიორიტეტი და არის ამიტომაც ჩვენ რუსეთის ფედერაციისგან მივიღეთ წერილობითი გარანტიები, რომ მიუხედავად ძალინ მძიმე მუხლებისა ექსტრადიციაზე დავთანხმდებოდით, რომ ეს პირი იქნება მოთავსებული ადამიანურ პირობებში საპატიმროში და მას არ დაემუქრება ის პრობლემა, რაც შეიძლება დაკვალიფიცირდეს ჩვენი ან ევროპული კონვენციის რომელიმე მუხლით. ეს არის წამების აკრძალვის მუხლი, რომელიც უნდა იყოს დაცული, სიცოცხლის უფლების დაცვა და ა.შ.", - განაცხადა თეა წულუკიანმა.
რამზან ახიადოვი უარყოფს მის მიმართ წაყენებულ ბრალდებას და საქართველოს ხელისუფლებას სთხოვდა, არ დაეშვა მისი რუსეთში ექსტრადირება, რადგან მას იქ წამება და არაადამიანური მოპყრობა ელოდება.