25 ოქტომბერს, საქართველოს ფინანსთა სამინისტროს მომსახურების სააგენტოსა და თიბისი ბანკს შორის ურთიერთთანამშრომლობის მემორანდუმი გაფორმდა, რომელსაც ხელი მოაწერეს ფინანსთა სამინისტროს მომსახურების სააგენტოს გენერალურმა დირექტორმა ზურაბ ახალკაციშვილმა და თიბისი ბანკის გენერალურმა დირექტორმა ვახტანგ ბუცხრიკიძემ.
ხელმოწერის ცერემონიას დაესწრეო საქართველოს ფინანსთა მინისტრი ნოდარ ხადური.
მემორანდუმის თანახმად, www.eauction.ge-ზე მომხმარებლებს საშუალება მიეცემათ ისარგებლონ თიბისი ბანკის ელექტრონული გადახდებით და განახორციელონ სხვადასხვა ტიპის ფინანსური ოპერაციები.
„ჩვენ ვავითარებთ ჩვენს სერვისებს, იმისთვის, რათა ადამიანებს, რომელთაც სურთ გარკვეული ქონება იყიდონ ან გაყიდონ ელექტრონული აუქციონის მეშვეობით, გაუადვილოთ კომუნიკაცია. ელექტრონული აუქციონის დანერგვის დღიდან მხოლოდ ქართუ ბანკს ჰქონდა უფლება და შესაძლებლობა მონაწილეობა მიეღო ამ პროცესში, თუმცა, 2012 წლიდან ქართუ ბანკი ჩაანაცვლა სხვა ბანკმა. ამ დრომდე მხოლოდ ლიბერთი ბანკის მეშვეობით იყო შესაძლებელი ელექტონული ანგარიშსწორება. დღეიდან, ამ პროცესში ჩაერთო თიბისი ბანკი, მალე დაბრუნდება ქართუ ბანკი. ჩვენ ვმუშაობთ სხვა ბანკებთან, მათ შორის, საქართველოს ბანკთან და საერთოდ, ყველა ბანკს ვთავაზობთ თანამშრომლობას ელექტრონულ აუქციონებში, რათა იყოს მეტი კონკურენცია და მოსახლეობა იყოს კმაყოფილი," - განაცხადა ფინანსთა მინისტრმა ნოდარ ხადურმა.
„ფინანსთა სამინისტროს მომსახურების სააგენტომ გადაწყვიტა მომსახურების არეალი გაეფართოვებინა. დღეს, ლიბერთი ბანკს დაემატა თიბისი ბანკი. იმედი გვაქვს, რომ შემოგვიერთდებიან სხვა ბანკებიც. გაიზრდება კონკურენცია ბანკებს შორის და მოსახლეობა ხელსაყრელი ტარიფებით შეძლებს ელექტრონულ აუქციონებში მონაწილეობის მიღებას," - განაცხადა ფინანსთა სამინისტროს მომსახურების სააგენტოს გენერალურმა დირექტორმა ზურაბ ახალკაციშვილმა.
„ეს არის წინგადადგმული ნაბიჯი. მთავარია ის, რომ მომსახურების ტარიფი უფრო გაუიაფდათ მომხმარებლებს. ელექტრონულ აუქციონებში რამდენიმე ბანკის მონაწილეობა ნიშნავს მეტ კონკურენციას, ზოგადად, ხარისხის გაუმჯობესებას, უკეთეს მომსახურებას. შესაბამიად, მოსახლეობა იქნება კმაყოფილი," - თიბისი ბანკის გენერალურმა დირექტორმა ვახტანგ ბუცხრიკიძემ.
ფინანსთა სამინისტროს მომსახურების სააგენტო განაგრძობს ბანკებთან თანამშრომლობას, რათა მომხმარებელს მუდმივად თანამედროვე და სწრაფი ანგარიშსწორების საშუალებები შესთავაზოს.
