დღეს ,,საზოგადოებრივი მაუწყებლის" ეთერში წინასაარჩევნო დებატების ფორმატში ერთმანეთს კოალიცია "ქართული ოცნების" საპრეზიდენტო კანდიდატი გიორგი მარგველაშვილი და "ნაციონალური მოძრაობის" კანდიდატი დავით ბაქრაძე დაუპირისპირდებიან.
17 ოქტომბერს დაგეგმილ დებატებში მონაწილეობას მხოლოდ კვალიფიციური საარჩევნო სუბიექტების წარმომადგენლები მიიღებენ.
დებატებზე ასევე წარმოდგენილი იქნებიან "ქრისტიან დემოკრატიული მოძრაობის" საპრეზიდენტო კანდიდატი გიორგი თარგამაძე და ახალი პოლიტიკური ცენტრის კანდიდატი ზურაბ ხარატიშვილი.
რაც შეეხება არაკვალიფიციური საარჩევნო სუბიექტების საპრეზიდენტო კანდიდატებს, მათი პირდაპირ ეთერში დაპირისპირება 18 ოქტომბერსაა დაგეგმილი.
აღსანიშნავია, რომ არაკვალიფიციურმა საპრეზიდენტო კანდიდატმა ნინო ბურჯანაძემ დებატების ფორმატში მონაწილეობაზე უარი განაცხადა.
ბურჯანაძის თქმით, მას საშუალება არ ეძლევა მის მთავარ კონკურენტს, მმართველი პარტიის საპრეზიდენტო კანდიდატს გიორგი მარგველაშვილს პირდაპირ ეთერში დაიპირისპირდეს, ამიტომ აღნიშნული ფორმატი მისთვის აზრს კარგავს.
საპრეზიდენტო კანდიდატების წინასაარჩევნო დებატები საზოგადოებრივი მაუწყებლის პირდაპირი ეთერით გადაიცემა.
მასალის გამოყენების პირობები
