რუსეთის პასუხმა ლიტვას, რომელმაც რამდენიმე დღის წინ გააკეთა განცხადება იმის შესახებ, რომ თუ რუსეთი მეზობელ ქვეყნებზე მათი ევროინტეგრაციისკენ სწრაფვის გამო ზეწოლას არ შეწყვეტს ის რუსეთსა და კალინინგრადის ოლქს შორის მიმოსვლას დაბლოკავს არ დააყოვნა.
ოქტომბრიდან ლიტვიდან რძის პროდუქტების შეტანაზე რუსეთის ფედერაციის ტერიტორიაზე შეზღუდვები წესდება. განცხადება ამის შესახებ რუსეთის მთავარმა სანიტარულმა ექიმმა გენადი ონიშჩენკომ გააკეთა.
მან განმარტა, რომ შეზღუდვის დაწესების მიზეზი ლიტვური პროდუქციის ხარისხის მიმართ არსებული პრეტენზიებია.
„მომავალი კვირის დასაწყისიდან ჩვენ დავიწყებთ ზომების გატარებას იმისათვის, რათა რუსეთის ბაზარზე ლიტვიდან შემოსული პროდუქციის შეტანა აიკრძალოს, რომელიც მომხმარებელთა უფლებების დაცვისა და უსაფრთხოების მაჩვენებლის გათვალისწინებით რუსეთის ფედერაციის კანონმდებლობას არ შეესაბამება", _ განაცხადა ონიშჩენკომ.
შეგახსენებთ, რომ მიმდინარე წლის 3 ოქტომბერს ლიტვა რუსეთსა და კალინინგრადის ოლქს შორის მიმოსვლის ბლოკადით დაიმუქრა იმ შემთხვევაში თუ მოსკოვი არ შეწყვეტს ზეწოლას მეზობელ ქვეყნებზე მათი ევროინტეგრაციისკენ სწრაფვის გამო. განცხადება ამის შესახებ „როიტერთან" საუბრისას ლიტვის საგარეო საქმეთა მინისტრმა ლინას ლინკიავიჩიუსმა გააკეთა.
„ჩვენ შეგვიძლია მატარებლების მოძრაობა შევაჩეროთ, შევაჩეროთ ტვირთების გადაზიდვა, რაც გნებავთ. თეორიულად ეს შესაძლებელია. თუმცა ეს არ განიხილება. ჩვენ ასე არ ვაზროვნებთ, ეს ჩვენი მეთოდები არ არის", _ განაცხადა მინისტრმა.
აღსანიშნავია, რომ სექტემბერში ლიტვასა და რუსეთს შორის საბაჟო კონფლიქტი გაჩაღდა. ვილნიუსში ამ კონფლიქტის წარმოქმნა დააკავშირეს იმასთან, რომ ლიტვა არის ერთ-ერთი მთავარი სპონსორი „აღმოსავლეთ პარტნიორობის" და ამჟამად არის თავმჯდომარე ევროკავშირის საბჭოში.
ლიტვური, მხარის ინფორმაციით, რუსმა მებაჟეებმა განსაკუთრებული ზედმიწევნით დაიწყეს ლიტვური ნომრების მქონე ავტომობილების შემოწმება კალინინგრადის ოლქთან საზღვარზე. გადამზიდავთა ნაციონალური ასოციაციის მონაცემებით რუსი მებაჟეების მოქმედებების გამო მიყენებულმა ზიანმა უკვე 10 მილიონი ევრო შეადგინა.