როგორც აფხაზეთის უმაღლესი საბჭოს თავმჯდომარემ გია გვაზავამ "ჯი-ეიჩ-ენთან" საუბრისას აღნიშნა, აფხაზეთის მთავრობის თავმჯდომარემ ვახტანგ ყოლბაიამ ავტონომიური რესპუბლიკის საკანონმდებლო ორგანოს უკვე წარუდგინა მთავრობის წევრთა სავარაუდო შემადგენლობა და დეპუტატები აღნიშნული საკითხის განხილვას ხვალიდან დაიწყებენ.

"მთავრობის წევრთა შემადგენლობა უმაღლეს საბჭოს დღეს, დღის ბოლოს წარმოედგინა. ჩვენ დილიდან დავიწყებთ ამ საკითხის განხილვას და საბოლოოდ სავარაუდოდ, მომავალი კვირის ბოლოსთვის ჩამოვყალიბდებით. ასევე, პროცედურულად დავგეგმავთ რა უნდა გავაკეთოთ. შემდეგ ალბათ, კომიტეტებში და ფრაქციებში გადავაგზავნით საკითხს განსახილველად და მათ შეფასებებს დაველოდებით. ძველი მინისტრებიდან არ მგონია ვინმე იყოს წარმოდგენილი ახალ მინისტრთა კაბინეტში,"- განაცხადა გია გვაზავამ

ამასთან, აფხაზეთის უმაღლესი საბჭოს თავმჯდომარის თქმით, მინისტრების კანდიდატურების შესარჩევად დეპუტეტებს გარკვეული კრიტერიუმებიც ექნებათ დაწესებული და აფხაზეთის მთავრობის სხვადასხვა სტრუქტურების პირველი პირობის პრეტენდენტებმა საკუთარი სამოქმედო გეგმები და სამომავლო განვითარების ძირითადი პრიორიტეტული მიმართულებები უნდა წარმოადგინონ.

"თითოეულ მათგანს აუცილებლად შევხვდებით, მოვისმენთ მათ გეგმებს, გადავხედავთ წარსულში მოღვაწეობის და საქმიანობის პერიოდს, მათ განვლილ გზას და ამ ყველაფრის გათვალისწინებით მივიღებთ საბოლოო გადაწყვეტილებას,"- აღნიშნა გვაზავამ.

რაც შეეხება აფხაზეთის მთავრობის მინისტრთა კაბინეტის ყოფილ წევრებს, გვაზავას თქმით, "ზოგი მათგანი ნორმალური ადამიანი იყო და თუ დაიმსახურებენ, შესაძლოა, ისევ იყონ წარმოდგენილი აფხაზეთის სხვადასხვა სტუქტურებში სხვადასხვა თანამდებობებზე".

"მართალია, ბოლო პერიოდში მათი მხრიდან საბოტაჟს ჰქონდა ადგილი, თუმცა მათშიც არიან ნორმალური ადამიანები და საქმის მცოდნეები,"- დასძინა გვაზავამ.

ამასთან, გვაზავამ აფხაზეთის განათლების და კულტურის მინისტრის პოსტზე სოხუმის თეატრის ყოფილი ხელმძღვანლის დიმა ჯაიანის შესაძლო დანიშვნის თაობაზე გავრცელებული ინფორმაციის კომენტირებისას განმარტა, რომ "იგი დიმა  ჯაიანს იცნობს როგორც საზოგადო მოღვაწეს და ჯერ-ჯერობით არ აქვს ინფორმაცია არის თუ არა წარმოდგენილი მინისტრთა კაბინეტის სავარაუდო შემადგენლობაში მისი სახელი და გვარი, თუმცა მინისტრების კანდიდატურების წარმოდგენა აფხაზეთის მთავრობის თავმჯდომარის პრეროგატივაა და მის მიერ შერჩეული ყველა კანდიდატურის განხილვა მოხდება".

ცნობისთვის, 2013 წლის 11 სექტემბერს აფხაზეთის ავტონომიური რესპუბლიკის უმაღლესი საბჭოს სესიაზე მიღებული გადაწყვეტილების თანახმად, აფხაზეთის ავტონომიური რესპუბლიკის მთავრობის თავმჯდომარის მოვალეობის შემსრულებელს ვახტანგ ყოლბაიას ავტონომიური რესპუბლიკის კონსტიტუციის 112* მუხლში მიმდინარე წლის 20 აგვისტოს შეტანილი კონსტიტუციური ცვლილებების საფუძველზე, აფხაზეთის ავტონომიური რესპუბლიკის მთავრობის თავმჯდომარის ყველა უფლებამოსილება მიენიჭა.

ყოლბაიას აფხაზეთის უმაღლესი საბჭოსთვის აფხაზეთის ავტონომიური რესპუბლიკის ახალი მთავრობის შემადგენლობა დასამტკიცებლად 7 დღის ვადაში უნდა წარედგინა და ეს ვადა სწორედ დღეს ამოიწურა.