ივ. ჯავახიშვილის სახელობის თბილისის სახელმწიფო უნივერსისტეტის რექტორი ლადო პაპავა მიიჩნევს, რომ ქვეყნის სოციალური და ეკონომიკური განვითარების სტრატეგიაში აქცენტი ცოდნაზე დაფუძნებულ ეკონომიკაზე უნდა იყოს გაკეთებული. როგორც ლადო პაპავამ ქვეყნის სოციალური და ეკონომიკური განვითარების სტრატეგიის პროექტის პირველადი განხილვის შემდეგ სააგენტო „ჯი-ეიჩ-ენს" განუცხადა, სტრატეგიაში აქცენტია გასაკეთებელი ცოდნაზე გაკეთებულ ეკონომიკაზე და არა სოფლის მეურნეობაზე.
„აქცენტია გასაკეთებელი ცოდნაზე დაფუძნებულ ეკონომიკაზე და არა სოფლის მეურნეობაზე. სოფლის მეურნეობა უნდა იყოს პრიორიტეტი, მაგრამ არა განმსაზღვრელი. იმიტომ, რომ მსოფლიოში ძალიან ბევრი ქვეყანა არის მხოლოდ სოფლის მეურნეობით განვითარებული და არის უმეტესი ღარიბი ქვეყნები. მთავარია, რომ ეკონომიკა იყოს ცოდნაზე დაფუძნებული, ანუ რასაც სპეციალისტები ახალ ეკონომიკას უწოდებენ",- აცხადებს ლადო პაპავა.
მისივე განმარტებით, როდესაც მრავალწლიანი სტრატეგია იწერება, აქცენტი უნდა იყოს აღებული, რომ საქართველოს გრძელვადიანი სტრატეგია ეფუძნება ცოდნაზე დაფუძნებული ეკონომიკის შექმნას.
პაპავა დიდი მნიშვნელობას ანიჭებს იმას, რომ მთავრობამ ქვეყნის სოციალური და ეკონომიკური განვითარების სტრატეგიის პროექტის განხილვა სწორედ თსუ-დან დაიწყო.
„ამ შეხვედრას დიდი მნიშვნელობა ქონდა, რადგანაც მთავრობამ წამოადგინა საკუთარი ხედვა, თუ როგორი უნდა იყოს საქართველოს ეკონომიკა 2020 წლისთვის. მნიშვნელოვანია, რომ ეს განხილვა/პრეზენტაცია შედგა ივ. ჯავახიშვილის სახელობის თბილისის სახელმწიფო უნივერსიტეტში. იმ სამეცნიერო ატმოსფეროში, რომელიც არის ამ უნივერსიტეტში და ძირითადად იმ კადრების, იმ პროფესორების მონაწილეობით. თავად დოკუმენტი არის საინტერესო. მართალია მოსაზრებები ჯერ კიდევ საჭიროებს დამუშავებას. ეს იყო მხოლოდ პირველი პრეზენტაცია და იმედი მაქვს, რომ მთავრობა გააგრძელებს მასზე მუშაობს სპეციალისტებისა და ეკონომისტების უშუალო ჩარევით"- აღნიშნა პაპავამ.
შეგახსენებთ, რომ დღეიდან ქვეყნის სოციალური და ეკონომიკური განვითარების სტრატეგიის პროექტის საჯარო განხილვები დაიწყო.პირველს განხილვას დღეს ივანე ჯავახიშვილის სახელობის თბილისის სახელმწიფო უნივერსიტეტმა უმასპინძლა, სადაც ფინანსთა მინისტრმა ექსპერტებსა და სხვადასხვა სამინისტროს წარმომადგენლებს ქვეყნის სოციალური და ეკონომიკური განვითარების სტრატეგიის პროექტი გააცნო.
