საქართველოს სასჯელაღსრულების, პრობაციის და იურიდიული დახმარების საკითხთა მინისტრის სოზარ სუბარის განცხადებით, მისი უწყების ახალმა ხელმძღვანელობამ საპატიმრო დაწესებულებების გძელვადიანი პაემნების ოთახებში ფარული ვიდეოკამერები აღმოაჩინა, რომლითაც პატიმარების მეუღლეებთან პირადი ცხოვრების ამსახველი ჩანაწერები კეთდებოდა.
მინისტრის თქმით, მას ამ თემებზე საუბარი არ უნდოდა, რადგან მსჯავრდებულების და მათი ოჯახის წევრების ტკივილი განახლდებოდა, თუმცა რადგან "ნაციონალური მოძრაობა" არ ჩერდება და წესით მისთვის ყველაზე მტკივნეულ სისტემაზეც ბედავს ლაპარაკს, იგი იძულებული გახდა ეს ეთქვა.
"მინაშვილი არის ტიპიური "ნაციონალი" რომელიც ახერხებს, რომ ტრადიციულად 9 წინადადებაში 10 ტყუილი თქვას. მისი არც ერთი ნათქვამი სიმართლეს არ შეესაბამება. ჯერ ერთი, მაყურებლებზე, რომლებზეც ლაპარაკობს, მათი უმრავლესობა იმ ციხეებში არ სხდან სადაც თვითონ ლაპარაკობს. მათი უმრავლესობა არის ცალკე საკანში გადაკეტილი, სადაც ის ვერანაირად ვერ იქნება მაყურებელი. მემკვიდრეობა, რომელიც ჩვენ მათგან დაგვხვდა, ეს არის 700-მდე მაყურებელი, მათ შორის, 200-მდე ძალიან გავლენიანი. ესენი არიან ადამიანები, რომლებიც ადმინისტრაციის დავალებით აუპატიურებდნენ და სცემდნენ სხვა პატიმრებს. მათი ნებართვის გარეშე ვერც ერთი პატიმარი თვითდაზიანების მიყენებას, სახალხო დამცველისადმი წერილის მიწერას და შიმშილობასაც ვერ გაბედავდა. არის თემები, რომლებზეც ლაპარაკი უბრალოდ არ მინდოდა, რადგან მართლა არ მინდოდა განმეახლებინა პატიმრების და მათი ოჯახის წევრების ტკივილი. მაგრამ, რადგან "ნაციონალური მოძრაობა" არ ჩერდება და მათთვის წესით ყველაზე მტკივნეული თემა რაც უნდა ყოფილიყო, იმაზეც კი ბედავს ლაპარაკს, უნდა ვთქვა, რომ ჩვენ ზოგიერთ დაწესებულებაში თვით გრძელვადიანი პაემნების ოთახებში ვიდეოჩამწერები აღმოვაჩინეთ, სადაც ზოგიერთი პატიმრის მეუღლესთან ცხოვრების სცენები ჰქონდათ გადაღებული და შემდეგ ამას ამ პატიმრების და მათი ოჯახის წევრების შანტაჟისთვის იყენებდნენ. ჩვენ არასოდეს დაგვიმალავს, რომ ეს იყო მოცემულობა, რომელიც დაგვხვდა და ამ მოცემულობის გადაჭრას და საბოლოოდ აღმოფხვრას სჭირდება იმ ინფრასტრუქტურული პროექტების დამთავრება, რომლებიც ჩვენ გვაქვს გეგმაში,"- განაცხადა სოზარ სუბარმა.