საქართველოს სასჯელაღსრულების, პრობაციის და იურიდიული დახმარების საკითხთა მინისტრის სოზარ სუბარის განცხადებით, "ნაციონალური მოძრაობის" მიერ სასჯელაღსრულების დაწესებულებებში არსებული მდგომარეობის ამსახველი სქემა სიმართლეს არ შეესაბამება.
მინისტრის თქმით, 2012 წლის საპარლამენტო არჩევნების შედგად ხელისუფლების ცვლის შემდეგ, სასჯელაღსრულების სამინისტროს ახალ ხელმძღვანელობას წინამორბედისგან 700-მდე ე.წ. ციხის მაყურებელი ერგო, რომელთაგან 200 სერიოზული გავლენების მქონეა.
სუბარის განმარტებით, საპატიმრო დაწესებულებებში ე.წ. მაყურებლები იზოლირებულ გარემოში იხდიან სასჯელს და მათ სხვა პატიმრებზე გავლენის მოხდენა ვერანაირად ვერ შეეძლებათ, სამინისტროს ხელმძღვანელობა კი, ციხეებში კონტროლს სრულად ახორციელებს.
"მაყურებლებზე, რომლებზეც "ნაციონალური მოძრაობის" უმრავლესობა ლაპარაკობს, იმ ციხეებში არ სხედან, სადაც თვითონ ლაპარაკობენ. მათი უმრავლესობა ცალკე საკანშია გადაკეტილი, სადაც ის ვერანაირად ვერ იქნება მაყურებელი. როდესაც კანონმდებლები საერთო რეჟიმზე საუბრობენ, უნდა იცოდნენ, რომ საერთო რეჟიმი 4 წლის წინ გაუქმდა და ასეთი ცნება ქართულ იურისპრუდენციაში არ არსებობს. ალბათ 4 წლის წინანდელი მაყურებლები ახსოვთ მათ, როდესაც ლაპარაკობენ სასადილოს მაყურებელზე და საქვაბის მაყურებელზე, ძალიან სასაცილო თემაა. ასეთი რამ არასოდეს ყოფილა და არც არსებობს. მემკვიდრეობა, რომელიც ჩვენ მათგან დაგვხვდა, ეს არის 700-მდე მაყურებელი. მათ შორის 200-მდე ძალიან გავლენიანი. ეს იყო რაც მე დამხვდა. ესენი იყვნენ ადამიანები, რომლებიც გახსოვთ, 2012 წლის ოქტომბერში 16-ე დაწესებულებაში და ქსანში არეულობებს აწყობდნენ. მათი უმრავლესობა დღეს არის გადაკეტილი და სხვა პატიმრებზე ვერანაირ გავლენას ვერ მოახდენენ. ნაწილი გაშვებულია და ისინი იმალებიან, სახლიდან ვერ გამოდიან რადგან სხვა პატიმრების შურისძიების ეშინიათ, იმიტომ რომ ესენი არიან ადამიანები, რომლებიც ციხის ადმინისტრაციის დავალებით სხვა პატიმრებს აუპატიურებდნენ და სცემდნენ,"- განაცხადა სოზარ სუბარმა.
შეგახსენებთ, რომ გუშინ "ნაციონალურმა მოძრაობამ" ე.წ. მაყურებლების მიერ ციხეების მართვის სქემა გამოაქვეყნა.