"ერთადერთი ადამიანი, ვისი ერთპიროვნული გადაწყვეტილებითაც ტელეკომპანიამ მუშაობა შეაჩერა, მე ვარ,"- ამის შესახებ ტელეკომპანია "მეცხრე არხის" გენერალურმა დირექტორმა ლუბა ელიაშვილმა საქართველოს პრემიერ-მინისტრ ბიძინა ივანიშვილის მიერ მისი ოჯახის საკუთრებაში არსებული ტელევიზიის დახურვის ფაქტის კომენირებისას გაკეთებული განცხადებების საპასუხოდ ისაუბრა.
ელიაშვილის თქმით, "გადაწყვეტილების მიზეზი იყო შოკი იმ ადამიანებისა, რომლებიც მუშაობდნენ ძალიან კარგ არხზე, ძალიან მოსწონდათ თავისი სამსახური და უცებ, არხის გარეშე დარჩნენ".
"მე ამ შენიშვნას ვიღებ ჩემს თავზე, იმიტომ რომ ერთადერთი ადამიანი, ვისი ერთპიროვნული გადაწყვეტილებითაც შეაჩერა მუშაობა ტელეკომპანიამ, ვარ მე. როგორც გენერალურმა დირექტორმა, მე მივიღე ეს გადაწყვეტილება და დანარჩენი თანამშრომლები რასაკვირველია, დამემორჩილნენ. გადაწყვეტილების მიზეზი იყო შოკი იმ ადამიანებისა, რომლებიც მუშაობდნენ ძალიან კარგ არხზე, ძალიან მოსწონდათ თავისი სამსახური და უცებ, არხის გარეშე დარჩნენ. ისინი იყვნენ ნამდვილ შოკში და ეს იყო ძალიან დიდი ემოციური სტრესი. არხს რომ სახე არ დაეკარგა, მოტივაციადაქვეითებული ადამიანების მუშაობას ის ძლიერი ხარისხი, რომელიც ჰქონდა ამ ტელევიზიას, არ დაეკნინებინა, მე მივიღე ეს გადაწყვეტილება და აბსოლუტურად, 100 პროცენტით მთელ პასუხისმგებლობასაც ვიღებ ჩემს თავზე", - განაცხადა ლუბა ელიაშვილმა.
ცნობისთვის, საქართველოს პემიერ-მინისტრ ბიძინა ივანიშვილის განცხადებით, "ტელევიზიის დახურვის შესახებ განცხადების გაკეთებისთანავე, არხზე მომუშავე პერსონალმა მაუწყებლობის გაჩერების გადაწყვეტილება თვითნებურად მიიღო, რითაც მათი პროფესიონალიზმი და პროფესიისადმი პატივისცემა გამოვლინდა".
"ჩემს განცხადებაში კარგად აღვნიშნე, რომ ჩემთვის ძალიან უხერხულია მედიასაშუალებების მეპატრონე ვიყო, რამეთუ მე დღეს ქვეყნის მთავრობის მეთაური ვარ. ამას გაგებით უნდა მოეკიდოთ. ეს არის დღეს ჩემი პოზიცია. ამავდროულად, მე ძალიან ვცდილობ, რომ ყველა ჟურნალისტს, ყველა ჩვენს მოქალაქეს მაქსიმალური პასუხისმგებლობით მოვეკიდო და თითოეული მათგანის ინტერესი მაქიმალურად გავითვალისწინო. მაგრამ ასეთი გაგებით, როგორც ახლა მოეკიდნენ, ჩემთვის ძალიან გულსატკენია რომ ლამის აქეთ დამამადლეს. ეს ათი თვე 10 მილიონი დოლარი მხოლოდ ჟურნალისტების გულისთვის დავხარჯე, აბა მე მეტი არაფერი მიზანი არ მქონია და არაფერი დაკვეთები მიმიცია არც ადრე "მეცხრე არხისთვის" და მით უმეტეს იმის შემდგომ, რაც ხელისუფლებაში მოვედით. ის დამოკიდებულება რომ გამოვიყენე, წარმოიდგინეთ, რომ არჩევნების შემდგომ ეს დამეხურა რა მოხდებოდა და როგორი აჟიოტაჟი მოჰყვებოდა. ვფიქრობ, რომ სწორი გადაწყვეტილება მივიღე. ჟურნალისტების რეაქცია იყო ჩემი აზრით არაპროფესიონალური და კარგად მესმის, იმიტომ, რომ იქ უმეტესობა იყო არაპროფესიონალი. ამიტომაც მიიღეს ასეთი გადაწყვეტილება. პროფესიონალები ასე არ მოიქცეოდნენ, ვინც მის პროფესიას პატივს სცემს, რომ განცხადების შემდეგ ადგნენ და არხი მიახურეს. თუ ისინი საკუთარ პროფესიას პატივს სცემენ და ჟურნალისტები არიან, ასე არ უნდა მოქცეულიყვნენ. თანაც ძალიან სამწუხაროა, რომ თქვენ თვითონვე გაქვთ ისეთი განწყობა, რომ უამრავი მყიდველია, რასაც მე სკეპტიკურად ვუყურებ. მაგრამ, თუ თქვენებურად არის, მით უმეტეს რისთვის დაიხურა ტელევიზია?! გაგეგრძელებინათ, მაყურებელს ხომ უნდა სცეთ პატივი, არა?! თქვენ ხომ მაყურებელი გყავდათ?! რატომ დახურეს ასე?! ასეა დაახლოებით ჩემი დამოკიდებულება,"- განაცხადა ბიძინა ივანიშვილმა.